Ministra Finansa interina, Sara Lobo Brites. Foto/Jogerjo Guterres..

DILI, 13 agostu 2019 (TATOLI)-Ministra Finansa interina, Sara Lobo Brites, konsidera Sensu Agríkola 2019 importante tebes ba Timor-Leste (TL), nune’e Governu deside hodi prevee orsamentu iha Orsamentu Jerál Estadu (OJE) 2019 nian hodi realiza sensu refere.

“Sensu agríkola ne’e importante tebes, tanba hosi rezultadu ne’e ita hotu hatene dadus loloos kona-ba estrutura kada umakain agrikultór ninian. Aléinde ne’e ho dadus refere sei ajuda Governu no parte interveniente sira hodi elabora polítika no programa iha setór agríkola ne’ebé ita hotu hatene hanesan prioridade prinsipál iha Planu Estratéjiku Dezenvolvimentu Nasionál (PEDN) 2011-2030″, Sara Lobo Brites hatete, ohin, liuhosi intervensaun iha serimónia lansamentu Sensu Agríkola 2019 iha resintu MAP, Komoro.

“Nune’e mós promove dadus peskiza ba agrikultura kada tinan ho nune’e ita bele halo akompañamentu ba moris agrikultór sira nian iha ita-nia rain”, atuál Vise-Ministra Finansa ne’e dehan.

Governante ne’e haktuir katak vantajen hosi Sensu Agríkola ne’e maka permite Governu promove no hadi’a produsaun alimentár, pekuária, ortikultura, floresta no peska.

“Bazeia ba razaun fundamental sira ne’e maka iha tinan 2019, Governu tau planu iha Orsamentu Jerál Estadu 2019 hodi implementa Sensu Agríkola ne’ebé tékniku sira hahú kedas iha tinan 2017 halo preparativu no esforsu di’ak tebes, no ohin ita bele halo lansamentu ba realizasaun Sensu Agríkola tuir padraun internasionál iha ita-nia territóriu tomak”, Sara Lobo Brites afirma.

Biban ne’e, Ministra Finansa interina ne’e husu ba ekipa Diresaun Jerál Estatístika no ekipa responsavel ba Sensu Agríkola 2019 halo monitorizasaun rutina iha terrenu hodi nune’e kontrola loloos lala’ok Sensu Agríkola.

Governante ne’e promete lori Governu Konstitusionál Daualuk sei fó apoiu másimu ba sensu ne’e to’o susesu.

Orsamentu ba realizasaun Sensu Agríkola ho montante millaun $5 ne’ebé tau iha Dotasaun Todu Governu nian.

Notísia relevante : FAO Espera Susesu Sensu Agríkola 2019 Sai Mós Susesu Nasaun Nian

Jornalista: Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here