Diretora Nasionál Veterinária Ministériu Agrikultura no Peska (MAP), Joanita Bendita da Costa. Foto/Natalino Costa.

DILI, 02 outubru 2019 (TATOLI) – Ministériu Agrikultura no Peska (MAP) sei konvoka enkontru ho entidade relevate sira, nune’e bele ko’alia kona-ba prevensaun ba moras Peste Suína Afrikana (PSA).

Diretora Nasionál Veterinária MAP, Joanita Bendita da Costa, haktuir Ministru Agrikultura no Peska, Joaquim José Gusmão dos Reis Martins, mak sei konvida entidade hotu hodi kolabora, fahe informasaun ba malu, nune’e bele minimiza risku moras African Swine Fever (ASF) ka PSA atu labele alastra tan bá munisípiu, maski moras fahi akontese iha Dili.

Nia dehan ekipa ne’ebé maka MAP sei serbisu hamutuk mak Polísia Nasionál Timor-Leste (PNTL), Alfándega no Autoridade Inspesaun no Fiskalizasaun Atividade Ekonómika no Sanitária (AIFAESA) hodi haree liuliu ba sasán importadu sira, nune’e bele halo vijilánsia rigoroza no regulár atu moras fahi labele hada’et bá iha munisípiu.

Serbisu hamutuk entre MAP ho AIFAESA importante atu haree ba produtu na’an fahi sira ne’ebé maka husi nasaun seluk labele tama mai tanba lei kuarentena la permite. Maibé, realidade produtu sira ne’e fa’an iha loja, tanba ne’e MAP kolabora ho AIFAESA atu haree ida ne’e hodi bele hola medida.

“Medida ba oin ne’e ha’u laiha kompeténsia atu ko’alia, maibé ami-nia Ministru Agrikultura no Peska maka sei iha orientasaun ba tékniku sira oinsá maka serbisu hamutuk entidade sira seluk hanesan AIFAESA rasik Customs no PNTL, nune’e bele buka tuir tanba saida maka sasán hanesan na’an lata Xina nian ne’ebé bandu ona husi kuarentena, realidade kontinua mai”, hateten.

“Durante ne’e ami servisu hamutuk hela, maibé bainhira ita iha servisu balun kabe ba kompeténsia AIFAESA nian no ida ne’ebé maka kompeténsia ami-nia”, dehan.

Maibé iha situasaun ida hanesan ne’e, oinsá maka bele halibur ona rekursu hamutuk hodi haree bá oin saida maka atu halo.

Kolaborasaun AIFAESA ho MAP ba kontrolu na’an lata iha loja, tuir Joanita Costa katak daudaun ne’e Timor-Leste ladauk iha laboratóriu ne’ebé apropriadu atu halo teste, maibé nasaun balun identifika ona katak moras PSA mós mai hosi na’an lata.

Notísia relevante : MAP Sei Kolabora ho AIFAESA Kontrola Hahán Lata Ne’ebé Fa’an iha Loja

Jornalista : Natalino Costa
Editora : Maria Auxiliadora

HAKEREK NO HATÁN

Please enter your comment!
Please enter your name here