Diretora Nasionál Veterinária Ministériu Agrikultura no Peska (MAP), Joanita Bendita da Costa. Foto/Natalino Costa.

DILI, 30 setembru 2019 (TATOLI) – Diretora Nasionál Veterinária Ministériu Agrikultura no Peska (MAP), Joanita Bendita da Costa, informa sei serbisu hamutuk ho Autoridade Inspesaun Fiskalizasaun Atividade Ekonómika Sanitária no Alimentár (AIFAESA) hodi kontrola na’an lata ne’ebé fa’an iha loja sira iha Dili laran.

Objetivu husi serbisu hamutuk entre MAP ho AIFAESA sai nu’udar meiu atu prevene moras fahi ne’ebé la’o maka’as iha Timor-Leste, ne’ebé rezulta hamate fahi komunidade nian kuaze 400 iha Dili liuhosi virus African Swine Fever (ASF) ka Peste Suína Afrikana (PSA).

“Ami-nia planu bá oin, ami sei rigorozu tebes tanba horisehik ha’u haree iha loja xineza ida iha CCD oin fa’an na’an fahi kalén. Nune’e ami sei servisu hamutuk ho AIFAESA hodi kontrola, se sira hanesan ne’e nafatin, proibe labele fa’an tan na’an lata”, dehan Joanita ba jornalista sira iha nia knaar fatin MAP, Komoro, ohin.

Tuir Joanita da Costa katak na’an fahi iha lata ne’ebé fa’an iha loja ne’e mós bele kauza moras fahi. “Maski nune’e ita seidauk hatene kauza loloos husi moras ASF infiltra husi ne’ebé maka mai ita nian rai. Tanba ne’e MAP iha ona hanoin hodi uza meiu atubele prevene moras fahi ne’ebé maka agora la’o iha Timor-Leste”, dehan nia.

Iha artigu 56/2013 kona-ba lei kuarentena ne’ebé bandu hahán importadór husi rai-li’ur, liuliu na’an fahi tanba hanesan nasaun viziña Indonézia no Austrália agora sira livre konsome.

Tanba ne’e, husi MAP sei kolabora AIFAESA hodi halo kontrolu rigór liután ba hahán importadu husi li’ur hanesan sira ne’ebé iha kalén maka fa’an iha loja no supermerkadu sira.

Notísia relevante : MAP Identifika Fahi Mate Tanba Kauza Husi Moras ASF

Jornalista : Natalino Costa 

Editora : Maria Auxiliadora

HAKEREK NO HATÁN

Please enter your comment!
Please enter your name here