Prezidente Komisaun A Parlamentu Nasionál, Carmelita Caetano Moniz. Imajen/dok.TATOLI

DILI, 23 setembru 2019 (TATOLI) – Prezidente Komisaun A (trata Asuntu Justisa no Konstitusionál), Carmelita Caetano Moniz, rekoñese tinan ida ne’e difísil atu finaliza Lei Antí-Korrupsaun (LAK) tanba iha ajenda barak.

“Presiza tempu uituan ba ami atu haree fali atu finaliza iha tinan ida ne’e, tanba loron 15 outubru Governu sei lori orsamentu mai. Tinan ida ne’e klaru difísil’’,  nia tenik ba Agência TATOLI, segunda ne’e.

Nia dehan, durante resesu iha 15 agostu to’o 15 setembru, Komisaun A vizita Macau hodi haree nasaun ne’e ninia implementasaun ba deklarasaun riku-soin no husi vizita ne’e hetan referénsia lubuk ida ne’ebé di’ak tebes hosi organizasaun no instituisaun sira hotu iha Macau.

Notísia Relevante: PPN Iha Esperansa Bele Finaliza Lei Anti-Korrupsaun Tinan Ne’e

Deputada Bankada CNRT ne’e haktuir, durante vizita ne’e ema Macau fó hanoin ba delegasaun Komisaun A sira liuhosi konferénsia no audénsia públika katak presiza haree didi’ak LAK.

“Sira hateten katak tenke tetu didi’ak. Labele ansi ho lei ne’e. Tenke haree didi’ak hodi halo lei ida ne’ebé di’ak ba ita-nia rain, liliu prevene no kombate korrupsaun. Ida ne’e mak importante tebes, entaun ema mós fó hanoin ba ami katak tenke tau medida rua hanesan medida reprensaun  katak medida kriminál no medida prevensaun kona-ba oinsá halo prevensaun nian”, esplika Prezidente Komisaun A.

Nia hatutan: “Ami hanoin katak atu tau medida rua ne’e hamutuk, medida prevensaun mak deklarasaun riku-soin maibé ami ba buka referénsia ami hanoin katak hafoin ida ne’e ami halo kontinuasaun ba iha Lei Antí-Korrupsaun”.

Tuir deputada ne’e agora Komisaun A prepara hela relatóriu pareser  tanba ne’e tenke lori mai plenária hodi rona hafoin kontinua ba diskusaun.

Nia informa, molok resesu Komisaun A halo ona diskusaun to’o iha artigu 22 iha kapítulu dahuluk.

“Agora ba kapítulu daruak ne’e ami atu desidi ba medida kriminál mak uluk ka medida prevensaun  mak uluk, maibé deputada barak hanoin katak medida prevensaun mak uluk. Hosi prevensaun ne’e mak hodi ita haree katak nia medida kriminál ne’e oinsá ho ninia pena’’, nia dehan tan.

Carmelita esplika, bainhira medida prevensaun tama ba iha kapítulu daruak ba prevensaun, entaun tenke haree uluk ba deklarasaun riku-soin.

“Agora deklarasaun riku-soin ami presiza halo fali lai kapítulu ida ne’e kompletu bazeia ba referénsia ne’ebé ami foti hotu tiha ona no ami haree didi’ak, liliu ita haree ba realidade ita-nia rain nian”, nia katak.

Antes ne’e, Prezidente Parlamentu Nasionál, Arão Noé de Jesus da Costa informa artigu iha LAK sei to’o artigu 100 resin hosi inísiu artigu 47.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here