Guarda Prizionál fo seguransa ba arguido nain rua husi kazu Kulu-hun iha TDD, tersa (01/10/2019). Imajen/Domingos Piedade

DILI, 01 outubru 2019 (TATOLI) -Tribunal Distritál Dili (TDD), ohin, kontinua halo julgamentu ba kazu Kulu-hun  ne’ebé envolve membru Polisia Nasional Timor-Leste (PNTL) nain rua ho inisiál FMS ho JPA.

Notísia Relevante : Vítima Trajédia Kulu-hun Fó Deklarasaun Ba Tribunál

Iha audiénsia julgamentu ne’e Tribunal rona testemuña nain tolu; JBG, NV ho EF ne’ebé hateten, sira haree rasik ho matan arguido nain rua mak lori pistola hodi tiru iha tenda laran momentu ne’ebá.

“Momentu ne’ebá festa hela mak mosu problema entre joven nain rua mak ha’u ba fahe sira atu la bele halo problema no ha’u ba tuur fali iha li’ur. Derrepente de’it rona  pistola tarutu no ha’u halai tama ba ema hateten, arguido JPA mak tiru,” hateten sasin JBG nu’udár mós membru FALINTIL-Forsa Defeza Timor-Leste (F-FDTL).

Sasin ho inisiál NV nu’udar mós membru F-FDTL iha nia depoimentu  dehan, molok problema ne’e buat hotu la’o iha tenda laran di’ak hela no labarik sira ne’ebé envolve iha problema mesak maun-alin de’it.  Mas derrepente arguido sira tiru ne’e mak halo ema iha tenda laran konfuzaun boot.

NV haree duni katak, arguido FMS mak tiru ba leten no arguido JPA mosu no tiru tesik de’it.

“Kuandu arguido JPA tiru tesik, ha’u koko atu helik aan tiha, no tiru se-se, ha’u lahatene no kuandu hotu ona mak haree ba buat hothotu barullu no pániku tebes,” hateten NV.

Nia hakbesik duni ba arguido JPA hodi husu tuir tansá mak tenke tiru no momentu ne’ebá kedas JPA ta’uk tanba hatene katak nia (NV-red) hanesan membru F-FDTL ida.

Iha biban hanesan, testemuña EF nu’udar funsionáriu Timor Telcom mós informa katak arguido FMS nu’udar maun rasik, no momentu ne’ebá nia parte hanesan master of ceremony (MC) ba festa kore-metan nee.

“Ha’u hanoin programa hahú kedas iha tuku 02 :00 OTL, no kuandu aviza dehan tuku 10 :00 OTL atu taka, maibé inan-aman balun dehan labele taka, no ba kalan fahe rua aviza dala ida tan hodi taka, maibé la konsege nafatin no ha’u ho oan feto fila ba uma, no hariis mai fali molok tama odamatan mak mosu konfrontu,” tenik nia.

Kona ba FMS tiru sa’e ba leten dala tolu iha festa laran, ema balun basa liman, haklalak no kontinua dansa, no kona ba arguido JPA mak tiru ka la tiru, nia parte lahatene, tanba ho distánsia metru lima.
Maibé, derrepente de’it rona pistola tarutu no nia parte mós hakru’uk ba rai, no hare katak vítima balun mate ona.

Audiénsia julgamentu nee prezide husi koletivu juis Edite Palmira, inklui ho juis estaziadu ida, Ministériu Públiku reprezenta husi prokuradór Jacinto Babo, arguido sira hetan asisténsia legal husi defensór públiku Estaquio Gutteres ho advogadu privadu Pedro Aparicio Guterres.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here