Arguido na'in rua nuu'dar membru PNTL partisipa iha kontinuasaun aúdensia julgamentu iha TDD, Kuarta (31/07/2019). Imajen/Domingos Piedade Freitas

DILI, 01 agostu 2019 (TATOLI) – Tribunál Distritál Dili (TDD), kontinua halo julgamentu ba kazu trajédia Kulu-hun ne’ebé involve direta hosi membru Polísia Nasionál Timor-Leste (PNTL) na’in rua ho inisiál JPA ho FMS.

Notísia Relevante :  Kazu Kuluhun, PR Kondena Oknum Polisia Tanba Atua Fora de Regra

Trajédia Kulu-Hun, Tribunal Rona Deklarasaun Arguido JPA

Iha kontinuasaun julgamentu, kuarta (31/7/2019), tribunál aprezenta sasin na’in haat nu’udar mós vítima ne’ebé sira nia isin lolon aliza tanba hetan tiru hosi arguidu na’in rua iha tenda laran.

Vítima Terezina Villa Nova, deklara ba tribunál katak, iha loron 17 fulan-novembru, tinan kotuk, iha festa kore-metan ida iha área Kulu-hun kraik (baixo), iha momentu ne’ebá vítima nu’udar uma na’in ba festa aviza ba konvidadu sira atu taka ona festa tanba kalan boot ona.

Iha momentu ne’ebá vítima rona ema barullu, hanesan ema diskute malu. Depois liu tiha oras balu rona kilat tarutu dala tolu, ba dala haat kona iha vítima nia liman parte loos tohar.

“Momentu ne’e ami aviza atu taka festa, tanba kalan boot tiha ona, ha’u la hatene ema problema, maibé rona barullu iha li’ur, depois liu tiha minutu balu mak ema tiru dala tolu ba dala haat mak kona ha’u nia liman tohar kedas”, deklara vítima iha audiénsia julgamentu.

Vítima hatete, oras ne’e nia liman ne’ebé hetan tiru labele kaer sasán todan, tanba ruin rahun hotu, nia sente aliza tanba kilat musan.

Iha fatin hanesan Lucio do Carmo Afonso, mós nu’udar vitima, deklara nia mós hetan tiru, tanba momentu ne’e tuur hela iha kadeira derrepente kilat musan borus ona iha vítima nia kotuk borus liu iha kabun sorin, halo vítima tenke hetan operasaun boot ba nia isin lolon.

“Ha’u ba asiste festa kuaze iha tuku 1:00 kalan no ha’u la hatene katak iha ne’ebá mosu problema, ha’u mós foti kadeira tuur, lakleur mak kilat musan kona ha’u nia kotuk halo ha’u monu kedas ba rai,” Lucio do Carmo Afonso haktuir ba tribunál.

Vítima Agriphino João da Costa, katak nia hetan tiru tanba momentu akontese problema nia salva hela nia inan ho kondisaun gravida.

“Ha’u hetan tiru tanba momentu nee ha’u dada sai ha’u nia inan hosi tenda laran, tanba momentu ne’e mos ha’u nia inan ho kondisaun gravida”, tenik Agriphino João da Costa.

Vítima Paulino de Jesus, ne’ebé hetan mós tiru, deklara ba tribunál katak iha momentu akontesementu tuku 12:00 kalan, iha Aldeia 03, Suku Kulu-hun, mosu diskusaun entre joven na’in rua iha tenda laran.

Iha momentu tanba ema hakilar malu maka’as rona duni, arguidu FMS hatete “kalma, kalma”, maibé joven sira la rona nafatin. Tanba ne’e halo arguidu sira hirus hodi tiru ema arbiru iha tenda laran.

Nia dehan, momentu nia rasik haree ho matan katak, arguidu JPA mak uza duni pistola tiru vítima na’in tolu mate iha fatin, balu hetan kanek, tanba arguido tiru raja-da de’it.

“Ha’u haree maun JPA mak tiru duni, halo kolega na’in tolu latan kedas, tanba nia tiru raja-da mak hodi kona hotu ha’u nia kabas,” vítima  Paulino de Jesus deklara.

Vítima Paulino de Jesus, informa festa  kore metan refere oknum PNTL FMS nia alin mane nia kore metan (aman maun-alin), tanba ne’e membru polísia refere konvida nia kolega polísia balun hosi Unidade Polísia Marítima (UPM)  inklui oknum polísia JPA hodi mai asiste festa refere.

Bainhira festa hahú, iha festa klaran, mosu diskute malu, entre joven sira, tanba ne’e membru polísia na’in-rua nee halo intervensaun hodi tiru inklui kontinua tiru diretamente ba família sira ne’ebé asiste hela festa kore metan nee hodi halai namkari hotu.

“Ha’u hamriik hela iha tenda li’ur haree katak arguido tiru hosi laran borus mai li’ur kona ha’u-nia liman, depois ha’u halai tama ba, JPA atu tiru tan kolega forsa ida, kolega dada an depois nia halai. Tiru nee iha kedas tenda klaran, ema toba tun rai hotu halo ema halai namkari,” nia konta.

Rona tiha sasin sira nee, Juiza Edite Palmira, Srybuana da Costa no akompaña mós hosi Juis estajiáriu na’in ida deklara, adia hikas  audiénsia julgamentu ba fali iha loron 19 agostu 2019.

Ministériu Públiku ne’ebé hanesan na’in ba kazu  reprezenta hosi Prokuradór Jacinto Babo no arguido sira hetan asisténsia legal hosi defensór públiku, Eustáquio Guterres no advogadu privadu Pedro Aparício Guterres.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here