Kampung Alor Dili. Imajen/Tatoli.

DILI, 01 outubru 2019 (TATOLI) – Ministru Administrasaun Estatal interino, Abilio Caetano, informa aban vendedór sira ne’ebé hala’o negósiu iha Kampung Alor sei hamamuk fatin hodi muda fali ba Golgota, Comoro.

Governu rasik halo ona kooperasaun ho empreza China Development atu perepara fatin iha Golgota ba negosiante Kampung Alor, nune’e negosiante sira bele muda hahú 2 to’o 10 outubru.

Notísia Relevante: Outubru, Governu Muda Negosiante Kampung Alor ba Área Golgota

Tanba ne’e, Ministru Abílio Caetano no Komandante Polísia Nasionál Timor-Leste (PNTL), Armando Monteiro, akompania ho Xefi Suku Comoro no Kampung Alor, hala’o enkontru ho Ministru Koordenadór Asuntu Ekonómiku, Fidelis Leite Magalhães hodi haree prosesu atu muda vendedór sira.

“Plaza Golgota prontu ona entaun ita tenke muda negosiante hirak ne’e. Ita muda sira ho fasilidade”, tenik Ministru ne’e ba Agência Tatoli iha Palacio Governu, kuarta ne’e.

Governante ne’e dehan, antes muda negosiante hirak ne’e, Governu prepara ona fatin ne’ebé dignu.

“Fasilidade ne’e prepara kedan hosi kompañia ida. Haree ba prontu ona entaun aban komesa muda ona sira to’o 10 outubru. Agora foin bele halo inagurasaun ida ba mudansa ida ne’e,” nia akresenta.

Daudaun ne’e, negosiante maioria sidadaun Indonézia hamutuk 207 iha área Kampung Alor.

Jornalista: Hortencio Sanchez

Editor: Xisto Freitas

HAKEREK NO HATÁN

Please enter your comment!
Please enter your name here