Eis Prezidente Repúblika, José Manuel Ramos Horta. Imajen Tatoli/Cipriano Colo

DILI, 23 setembru 2019 (TATOLI) – Eis Prezidente Repúblika, José Manuel Ramos Horta, husu Parlamentu Nasional (PN) atu autoriza Xefe Estadu, Francisco Guterres Lú Olo hodi partisipa iha tomada pose ba Prezidente Repúblika Indonézia, Joko Widodo no mós serimónia intronamentu ba imperadór foun Japaun.

Diplomata seniór ne’e husu tanba Xefe Estadu Lú Olo simu konvite ofisiál hosi nasaun rua atu partisipa iha serimónia importante rua ne’e, no tenke autoriza tanba ne’e liga ho diplomasia Xefe Estadu nian.

Horta husu ne’e, hafoin enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, ohin.

Lee mós: PR Lú Olo Haruka Tan Pedidu Viajen Estranjeiru Ba PN

Tuir Horta hatene katak Indonézia konvida de’it nasaun sanulu ne’ebé mak iha ASEAN inklui Timor-Leste, no nia dehan, ida ne’e importante atu partisipa tanba nia impaktu ba Timor-Leste (TL) nia diplomasia.

Kona-ba konvite ne’e, Prezidente Repúblika informa ona ba Parlamentu Nasionál maibé depende ba desizaun polítika PN nian.

Iha novembru tinan kotuk, bainhira Horta vizita Japaun hodi partisipa iha konferénsia ida iha ne’ebá (Japaun) hanesan oradór prinsipál, atuál imperadór foun ne’e iha altura ne’ebá hanesan príncipe erdeiru ne’ebé partisipa hodi rona mós diskursu Horta nian.

“Nia ko’alia ho ha’u katak nia sei konvida Xefe Estadu Timor-Leste atu partisipa serimónia entronamentu ne’e. Tanba ne’e, iha tinan ida ne’e, iha kontestu Timor-Leste, laiha ema ida ne’ebé boot liu Prezidente Repúblika atu partisipa iha serimónia tomada pose ba Prezidente foun Indonézia no serimónia intronamentu imperadór Japaun nian”, Horta hateten.

“Prezidente Repúblika, Francisco Guterres Lú Olo mós hakarak partisipa iha serimónia importante rua ne’e maibé hein desizaun Parlamentu Nasionál iha tempu badak”, nia hatutan.

Kona-ba posizaun Parlamentu nian karik sei vota kontra, Horta hateten, ne’e la’ós bíblia tanba lei bele muda no bele muda mós votasaun.

“Parlamentu mós hanoin didi’ak fila fali atu autoriza Prezidente Repúblika nia viajen ba serimónia ne’e tanba Xefe Estadu la konsege partisipa ona iha serimónia importante hanesan Asembleia Jerál Nasaun Unida”, nia subliña.

Horta mós fó hanoin ba Parlamentu katak sei iha tempu sufisiente atu Parlamentu halo desizaun ne’ebé mak di’ak ba nasaun.

“Ne’e ita-nia nasaun no Estadu nia naran no ne’e ba líder hotu nia kredibilidade inklui kredibilidade Parlamentu Nasionál nian”, nia esklarese.

Líder nasionál ne’e mós kestiona katak oinsá mak Parlamentu iha kredibilidade no hetan previleiju hodi halo vizita ba rai li’ur no halo estudu komparativu, maibé iha rai laran PN sai dezafiu ba asaun diplomátika Xefe Estadu nian.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here