Diretora Nasionál Veterinária Ministériu Agrikultura no Peska (MAP), Joanita Bendita da Costa. Foto/Natalino Costa.

DILI, 30 setembru 2019 (TATOLI) – Diretora Nasionál Veterinária Ministériu Agrikultura no Peska (MAP), Joanita Bendita da Costa, husu ba komunidade atu labele konsome na’an fahi bainhira hetan ona virus African Swine Fever (ASF) ka Peste Suína Afrikana (PSA).

“Ami husu ba komunidade atu labele konsumu fahi ne’ebé hetan virus, virus ona bele hakoi de’it”, dehan Joanita Bendita ba jornalista sira iha nia knaar fatin MAP Komoro, ohin.

Nia dehan virus ASF ne’e rasik sei la hada’et ba ema, maibé husi MAP kontinua husu ba komunidade atu kolabora hodi labele han na’an fahi ne’ebé kona moras PSA tanba husi ne’e bele kontribui virus moras fahi bele habelar liután.

Hodi haktuir katak hafoin MAP haruka amostra iha setembru ne’e ba iha Austrália, rezultadu fó sai katak fahi komunidade iha Dili mate kuaze 400 tanba kona virus ASF no moras ne’e nia orijen mai husi Áfrika.

Nia salienta katak MAP forma ona ekipa tolu no dezloka ona ba munisípiu hotu atu halo sosializasaun ba komunidade sira oinsá prevene virus PSA iha fahi.

Nia husu favór ba komunidade atu hapara movimentasaun fahi iha Dili bá munisípiu tanba bele da’et. Tanba ne’e, MAP serbisu hamutuk ho aeroportu no portu hodi tau-matan ba produtu importadór sira hanesan na’an fahi hosi nasaun li’ur.

“Ami mós sei serbisu hamutuk ho diretór parte PNTL Dili atu oinsá halo kontrola iha postu tránzitu Tibar, Hera no Dare, kona-ba transportasaun fahi ba munisípiu”, dehan nia.

Notísia relevante : MAP Sei Kolabora ho AIFAESA Kontrola Hahán Lata Ne’ebé Fa’an iha Loja

Jornalista : Natalino Costa

Editora : Maria Auxiliadora

1 KOMENTÁRIU

HAKEREK NO HATÁN

Please enter your comment!
Please enter your name here