Sekretáriu Estadu Juventude no Desportu, Nélio Isaac Sarmento. Imajen/Tatoli

DILI, 26 setembru 2019 (TATOLI) – Sekretáriu Estadu Juventude no Desportu, Nélio Isaac Sarmento, husu ba federasaun desportu sira ne’ebé daudaun ne’e utiliza hela Jináziu Dili tenke koopera ho Governu nune’e bele hala’o reabilitasaun ba fatin refere.

Tanba ne’e, nia dehan, federasaun sira tenke muda provizoriamente no bainhira fatin ne’e reabilita ramata sira bele utiliza fila fali.

Lee mós: FBTL Husu Governu Prepara Fatin Hodi Muda Hosi Jináziu Dili

“Ha’u respeita tebes preokupasaun federasaun sira-nian. Fatin ne’ebá Governu mak fó. Governu mak kria kondisaun. Agora, Governu atu hadi’a di’ak liután fatin ne’ebá para ita atu utiliza ho segura. Maibé, ita hotu dehan lakohi sai ha’u atu responde saida. Entaun, ha’u husu ba federasaun hirak ne’e bele sai provizóriu lai. Edifísiu ne’e di’ak tiha bele utiliza fila fali,” katak Nélio iha Paláçio do Governo, kinta ne’e.

“Parte seluk ruma mak halo hanesan ne’e karik loos. Maibé, federasaun sira ne’ebé loron kalan Governu mak fasilita hela ne’e mak atu halo fali impedimentu ba konstrusaun ne’e mak la tama iha kakutak,” nia lamenta.

Entretantu, objetivu reabilitasaun ba Jináziu Dili ne’e atu prepara ba jogu Komunidade Nasaun Ko’alia Lian Portugés (CPLP-sigla portugés) ne’ebé sei realiza tinan oin iha Timor-Leste.

Fatin ne’ebé Governu desidi ona atu hala’o jogu ne’e mak hanesan Estádiu Munisipál Dili, Estádiu Café Ermera no Jináziu Dili.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here