iklan

DESPORTU, HEADLINE

FBTL Husu Governu Prepara Fatin Hodi Muda Hosi Jináziu Dili

FBTL Husu Governu Prepara Fatin Hodi Muda Hosi Jináziu Dili

Sekretáriu Jerál Federasaun Basketból Timor-Leste, Igildo Tilman. Imajen espesiál

DILI, 19 setembru 2019 (TATOLI) – Sekretáriu Jerál Federasaun Basketból Timor-Leste (FBTL), Igildo Tilman, husu ba Governu atu prepara uluk fatin ba sira hafoin muda federasaun husi Jináziu Dili.

Daudauk ne’e, Governu liuhosi Sekretaria Estadu Juventude no Desportu (SEJD) husu ba federasaun hirak ne’ebé durante ne’e utiliza hela Jináziu Dili atu, atu muda tanba sei hala’o reabilitasaun iha tempu besik, nune’e bele prepara ba Jogu Desportivu ba Komunidade ho lian portugés (CPLP- sigla portugés), tinan oin.

“Governu husu ona ami atu retira sai hosi fatin ne’ebá, maibé sira la fó alternativu seluk ba iha federasaun sira. Sira hatene hela katak ami ne’e depende ba Governu, tanba ne’e bainhira atu hasai ami tenke kria lai fatin-oan ruma para ami bele muda”, tenik Igildo Tilman ba Agência TATOLI iha Aeroportu Internasionál Prezidente Nicolau Lobato, kinta ne’e.

Nia dehan, agora daudaun mosu hela problema boot ba federasaun hirak ne’ebé utiliza hela Jináziu Dili hanesan edifísiu atu hala’o serbisu.

“Agora problema hela tanba ami atu muda sai oinsá, tanba fatin seidauk iha ba ami no ekipamentu sira mós barak iha ne’ebá. Ami husu Governu bele kria hela fatin ruma mai ami mak foin haruka ami sai, tanba agora daudauk ami laiha kbi’it atu buka fatin seluk,” akresenta Sekretaria Jerál.

Federasaun hirak ne’ebé okupa hela Jináziu Dili hanesan FBTL, Federasaun Voleibol Timor-Leste (FVTL), Federasaun Karatedu Timor-Leste (FKTL), Federasaun Taekwondo Timor-Leste (FTTL), Federasaun Halterafelizmu Timor-Leste (FHTL) no Federasaun Xandre Timor-Leste (FXTL).

Entretantu, kona-ba prosesu reabilitasaun Jináziu Dili, ne’e oras ne’e daudauk sei iha hela prosesu konkursu.

Jornalista: Hortençio Sanchez

Editór: Xisto Freitas

iklan
iklan

Leave a Reply

iklan
error: Content is protected !!