Koordenadór JSPM, José Pereira. Imajen/Horteçio Sanchez

DILI, 26 setembru 2019 (TATOLI) – Koordenadór Programa Monitorizasaun Sistema Judisiál (JSPM-sigla inglés), José Pereira, hateten tuir monitorizasaun sira nian ba Parlamentu Nasionál (PN) durante ne’e iha duni vontade (kompromisu) atu finaliza Lei Antí-Korrupsaun (LAK) maibé presiza tempu hodi haree didi’ak tanba iha artigu barak mak presiza diskute kle’an.

Nia akresenta, prosesu diskusaun ba lei kle’ur tanba sei haree didi’ak hosi artigu ba artigu tanba antes ne’e iha artigu 37 maibé agora to’o artigu 100 resin.

Tuir deliberasaun husi plenária, diskusaun espesialidade LAK kompeténsia Komisaun A (trata Asuntu Justisa no Konstitusionál).

“Prosesu diskusaun ba lei ne’e la’o kle’ur tanba deputadu sira liliu komisaun A sira tenke diskute artigu ba artigu. Bele artigu ida sira diskuti loron ida de’it. Entaun, artigu 100 resin ne’e presiza tempu naruk uituan no tenke haree didi’ak”, tenik José Pereira ba Agência Tatoli iha Edifisiu JSMP, Colmera, kinta ne’e.

Notísia Relevante: Prezidente Komisaun A Rekoñese Difísil Finaliza LAK Tinan ne’e

Tuir nia, LAK tenke defini klaru kona-ba envolvimentu ema ka kompañia ba kazu ruma.

“Ami hakarak Lei Antí-Korrupsaun tenke prevee klaru. Kombate korrupsaun maibé labele envolve de’it individu maibé envolve mós kompañia no organizasaun tanba hosi parte sira ne’e hotu serbisu hamutuk mak foin akontese. Entaun, atu kombate presiza lei ida ne’ebé di’ak no forte tanba ne’e mak presiza tempu atu diskute no haree didi’ak”, dehan Koordenadór JSMP.

Nia subliña, maski ema hotu hakarak lei ne’e tenke aselera lalais maibé tenke haree no tetu didi’ak tanba ida ne’e la’ós fásil.

“Ita hakarak lalais maibé ida ne’e lei entaun ita presiza haree didi’ak. Bainhira tama ona iha vigór ne’e obrigatóriu. Se ita hakarak lalais mós halo lei ida sala mak ita implementa la lori rezultadu di’ak,” nia tenik.

Jornalista: Horteçio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here