Primeiru-Ministru, Taur Matan Ruak, lidera enkontru Konsellu Ministru, kuarta, (21/9). Imajen António Goncalves

DILI, (TATOLI) – Governu liuhosi enkontru Konsellu Ministru, ohin deside hodi hanaruk kontratu ba kompañia ne’ebé fornese kombustivel ba sentrál eletrika Hera mak Esperansa Timor Oan Lda (ETO) no Betanu, SAKOM, to’o loron 30 fulan-setembru tinan ne’e.

Ministru Reforma Lejislativa no Asuntu Parlamentár, Fídelis Leite Magalhães, hateten kontratu tuan ne’ebé governu estabelese ho kompañia rua iha loron 22 juñu 2017 no sei termina iha marsu 2019, tanba ne’e tenke hanaruktan hodi garante fornesimentu normál.

Nia dehan bainhira kontratu termina, governu liuhosi Ministériu Obras Públikas sei loke konkursu foun ba públiku ho kategoria konkursu  internasionál.

Projetu rezolusaun ne’e aprezenta hosi Ministru Obras Públikas, Salvador Eugénio Soares dos Reis Pires.

Ministru Salvador Pires hatete bazea ba lei, governu tenke halo preparasaun durante fulan neen molok loke konkursu foun ho kategoria internasionál.

Tuir kalkulasaun hosi EDTL, kompañia rua ne’e sei fornese tan mina litru ba milliaun 65 to’o setembru 2019.

Jornalista: Agapito dos Santos

Editora: Rita Almeida

HAKEREK NO HATÁN

Please enter your comment!
Please enter your name here