Padre Pároku Baucau Manuel Ximenes. Foto TATOLI: Joanico de Araújo

BAUCAU, 25 setembru 2019 (TATOLI)-Padre Pároku Dioseze Baucau, Manuel Ximenes sasin katak matebian Pe. João de Deus katak durante hela hamutuk ho matebian, nianaprende ezemplu apostuladu nian maske ho otas avansadu tebes ona.

“Ha’u durante hamutuk ho nia, ha’u aprende ezemplu apostuladu maske katuas hanesan ne’e nia la sente kolen reza misa, rona konfisaun no viajen ba fatin sira ne’ebé dook husi postu administrativu sira, nia prontu la’o nafatin nia ezemplu apóstolu haktuir Padre Pároku Manuel Ximenes ba Ajénsia TATOLI bainhira ramata misa agradesimentu ba padre Joao de Deus Pires SDB iha Dioseze Baucau, tersa ne’e.

Amu ne’e konta katak iha loron ida la fó oráriu ba Pe. João de Deus matebian ne’e atu halo misa dook iha Baguia tanba haree nia kondisaun fraku, entaun nia fó oráriu besik parókia de’it maibé ikus mai padre João de Deus hirus no soe xave mai dehan, save karreta mak ne’e ona, karreta para de’it ona ha’u prontu mate iha kuartu ona, tanba la fó oráriu mai ha’u atu halo misa.

“Entaun ha’u laran triste tanis dehan, padre ha’u hadomi ita ha’u la iha intensaun aat hasoru ita maibé katuas ona ne’e mak ha’u fó oportunidade hanesan ne’e maibé ha’u la iha intensaun aat maibé ha’u hadomi tebes ita”.

“Tanba ne’e mak ha’u aprende husi nia ezemplu apóstolu ba joven sira, ba sarani sira no aprende mós ho ninia vida orasaun molok ami tama kapela nia iha tiha ona kapela laran nia hadomi nia vokasaun ho vida orasaun ne’ebé ninia vida espirituál ho ninia misaun domin ba povu makas tebes ida ne’e mak sai hanesan dalan ida dudu ami liuliu ba apostuladu sira uluk sira uitoan agora apostuladu sira barak ida ne’e hanesan lisaun ida ne’ebé ami aprende atu oinsá mak bele buka tuir no moris tuir ninia ain fatin” dehan Eis-padre Pároku Laga ne’e.

Amu Manuel Ximenes rekoñese kata matebian Pe. João de Deus hanesan aman di’ak ida ba salezianu sira liuliu ba antigu alunu sira, ba kooperadór salezianu no joven nia hanesan aman, mestre, belun ba família salezianu tomak.

Enkuantu, iha misa agradesimentu ne’e Padre Pároku Baucau, Manuel Ximenes iha nia omilia hateten tuir espíritu umana ita lakon ita-nia aman belun no mestre nia esperiénsia fiar nian, Padre João la mate maibé Padre João moris no moris ho Maromak, iha Maromak nia futar oin ho nia moris mak ita hirak ne’ebé halibur hamutuk iha ne’e.

“Tanba ne’e mak ita hamutuk uluk nana’in agradese ba Maromak tanba Maromak ne’ebé laran luak, laran maus hadomi tebes no fihir tebes Padre João de Deus sai ninia instrumentu hodi fó testemuña ba ninia misaun Timor Lorosa’e nian”.

Iha 1958, Amu João de Deus mai Timór la iha interese seluk maibé Amu João de Deus mai Timór tanba fiar iha Maromak no hadomi iha Maromak tanba ne’e nia mai la lori osan mean no osan mutin mai ita timor oan sira.

Maibé, nia lori mai ita ho Maromak nia grasa no bensa mai ita to’o ohin loron ita simu sakramentu batizmu husi nia balun simu sakramentu kaben husi nia rihun ba rihun tanba nia lori Maromak nia domin ba ita.

“Atu ita timoroan sira liuliu Baucau oan sira moris iha Maromak nia grasa atu hatene Maromak katak Maromak mak halo ita moris ohin loron ita hotu hatene ita-nia aan katak amu João de Deus mai iha tempu portugés mai ho ninia kolega na’in rua maibé nia kolega na’in rua mate uluk ona sira mai Timór sira husik sira nia família inan aman no maun alin sira maibé povu Timór mak sai hanesan nia inan no aman maun no alin sira,”.

Sente Triste

Padre Pároku Baucau Manuel Ximenes hateten durante tinan haat nia laran hamutuk ho padre João de Deus pires maibé nia mate ona, nu’udar umanu ida sente triste tebes tanba nia hanesan ezemplu apostuladu ida di’ak tebes, la sente kolen atu halo nia misaun hanesan amu lulik.

“Bainhira ha’u rona padre João de Deus agonia, ha’u sai misa iha Baucau ba liu Dili, liu tiha oras rua mak nia mate no ha’u kontente katak ha’u prezensa mós nafatin ho nia nu’udar ha’u nia aman. Husi Padre João mak hetan edukasaun di’ak,” dehan Padre Pároku Manuel Ximenes.

“Ha’u triste lakon ona ema ida modelu ida hanesan Padre João de Deus, ba ami-nia vokasaun salezianu nu’udar amu lulik ne’ebé nu’udar ema sentimentu tristeza sempre iha tanba ema ida ne’ebé hadomi eduka ita, ita tenke simu realidade tanba loron ida ita hotu sei hetan malu iha Maromak nia oin. Ne’ebé, ita entrega ona ba Maromak oin, nia tenke reza fali ba ita ne’ebé sei moris iha mundu,” tenik amu lulik salezianu ne’e.

 Entretantu, Padre João de Deus Pires nia mate isin to iha Baucau, sarani Katólika atus ba atus mak simu ho tristeza. Nune’e mós simu, akompañadu ho babadok no tambór no mós halo misa agradesimentu, ne’ebé prezide husi Bispu Dom Basílio do Nascimento hamutuk ho na’in lulik sira.

Depois, tuir mai lori ba deskansa kalan ida iha Fatumaka no sei halo funebre, orsida tuku 10h00, iha semitériu Waibehana Gariuai.

Notísia relevante:In Memoriam: Pe. João de Deus, “Cala-te e Vai”

Jornalista: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here