Bispu Dioseze Baucau, Mgr. Basilio do Nascimento. Imajen/Nelson de Sousa

BAUCAU, 24 setembru 2019 (TATOLI)—Bispu Dioseze Baucau, Dom Basílio do Nascimento, hateten Pe. João de Deus Pires nia domin ne’ebé transmite ba rai Timor-Leste ne’e hanesan liafuan bíblia nian dehan “Ó tuir ha’u mai!”.

“Oras ne’e, katuas Pe, João de Deus Pires nia isin-mate toba iha ne’e, dezde nia rai ne’ebá to’o ohin, Maromak nia liafuan dehan ‘Ó tuir ha’u mai!’, ó la gosta mós provinsiál dehan ó ba nonook, ó tuir ha’u mai ba rai ida naran Timor,” dehan Bispu Dioseze Baucau, Dom Basílio do Nascimento, bainhira hato’o ninia lia-tatoli hafoin ramata misa requiem ba Pe. João de Deus Pires iha Igreja Dioseze Baucau, tersa (24/09/2019).

Liafuan daruak, nia hatutan, ita sukat ho obra ne’ebé Pe. João de Deus Pires halo, kaer ba Abrão nia liafuan dehan “Husi ó ha’u sei fó bensaun ba ó-nia jerasaun sira”. Ne’e duni haree ba amu salezianu sira iha ne’e, Filhas de Maria Auxiliadora (FMA), Fatumaca, Quelicai, Baguia, Pe. João de Deus nia hun mak “Husi ó ha’u sei fó bensaun ba ó-nia jerasaun sira”.

Ohin, nia esplika, ita lorosa’e iha obra ida ne’e tanba Pe, João de Deus Pires ida ne’e sai referénsia ba Dioseze Baucau no mós ba kristianizmu iha ne’e. Tanba bainhira nia mai tuur iha ne’e mak ita bele dehan permanente tanba nia mesak labele halo buat hotu. Maibé, depois kongerasaun saleziana neineik ba neineik halekar aan hodi hato’o evanjelizasaun ba lorosa’e tomak.

“Liafuan ikus ha’u foti husi São Mateus, ‘Imi sira ne’ebé hanesan ha’u-nia aman ki’ik hanesan ema ne’ebé eskollidu, nia mai, imi simu reinu ne’ebé ha’u-nia aman prepara ba imi hanesan ha’u-nia liman rohan. Dezde mundu hahú mak ha’u-nia aman prepara mundu ne’e ba imi,” Amu Bispu Basílio esplika.

Ita hotu ne’ebé tuir ita-na’in Jesus Kristu, tuir amu bispu, liuhusi Pe. João de Deus Pires nia sasin, ita haree katak fiar iha Maromak resurreisaun ne’e la’ós buat leet de’it. Maibé, liuhusi Pe. João nia ezemplu no ninia testemuña, ita haboot ita-nia fiar.

“Liafuan ikus ba família saleziana, amu lulik sira, antigu alunu, família salezianu tomak, ha’u nia sentimentu kondolénsia, ita hotu no uma kreda tomak lakon, loos duni, maibé ita-boot sira mak sai hanesan eransa Pe. João de Deus nian.

Maibé eransa ida ne’e, nia dehan, fó lisensa no molok ita atu fahe malu ne’e, ha’u bele dehan eransa ida ne’e ba amu foinsa’e sira ne’e todan. Tanba saleziana sira-nia oin ne’e, katuas na’in rua hanesan Pe. Joao de Deus no Pe. Eligio Locatelly ne’e hatudu. Ohin loron, imi-nia ema sira ne’e kaer salezianu ne’e haree nafatin ba katuas rua ne’e nia oin.

“Ne’eduni mak ha’u dehan katak eransa ne’ebé Pe. João no Locatelly husik hela, todan ba imi amu salezianu sira. Ne’ e duni iha imi-nia liman atu fó onra no haboot nafatin naran Don Bosco nian. Sasukat ne’ebé imi salezianu sira halo ba uma kreda, liuhusi Pe. Joao de Deus Pires nia dedikasaun ba Timor-Leste liuhusi evanjelizasaun,” Bispu Basílio esplika.

Notísia relevante:Pe. João de Deus Ezemplu Apostuladu

Joranilsta: Felicidade Ximenes

Editór      : Rafy Belo

HAKEREK NO HATÁN

Please enter your comment!
Please enter your name here