DILI, 08 jullu (TATOLI)-Projetu konstrusaun fízika terminál portu pasajeiru oras ne’e dadaun atinji ona pursentu 95.

Projetu ne’e hetan apoiu orsamentu husi governu Japaun ho montante U$ 20.342,600 Milloens.

Terminál portu pasajeiru ho medida naruk husi rai laran ba tasi metru 100 no luan metru 20 metru.Terminál ne’e iha kapasidade roo rua hodi atraka ba.

“Ohin ne’e ekipa husi Ajénsia Internasionál Kooperasaun Japaun (JICA), Autoridade Portuariu Timor-Leste (Aportil) no mídia sira hakarak mai vizita konstrusaun fízika terminál pasajeiru, hanesan parte ida mós bele halo familiarizmu liután ho instituisaun hirak ne’e. Nune’e mós haree besik liután konstrusaun fízika,” hateten Reprezentativu Xefe JICA iha Timor-Leste, Nagaishi Masafumi iha Ponte kais, ohin.

Nia hateten, projetu fíziku konstrusaun daudaun ne’e atinji ona pursentu 95. “Hahú nia inísiu nia konstrusaun iha fulan jullu 2017 no tuir planu sei entrega iha tinan ne’e nia laran”.

Maibé, tuir reprezentante JICA iha Timor-Leste ne’e, haree ba konstrusaun fízika daudaun ne’e besik ramata ona tanba ne’e espera iha fulan setembru ka outubru bele entrega ona ba governu.

Iha fatin hanesan, Prezidente APORTIL, Flavio C. Neves konsidera projetu terminál portu foun ne’e kualidade tebes.

“Hakarak agradese ba governu Japaun nia apoiu. Espera terminál foun ne’e sai hanesan ezemplu ka referénsia mai ita, bele dezenvolve mós portu passajeiru rejionál sira seluk,” espera Prezidente APORTIL ne’e.

Jornalista :Nelson de Sousa

Editór .     : Rafy Belo

HAKEREK NO HATÁN

Please enter your comment!
Please enter your name here