Prezidente Parlamentu Nasionál, Arão Noé de Jesus da Costa Amaral. Imajen Tatoli/António Gonçalves

DILI, 22 setembru 2019 (TATOLI) – Prezidente Repúblika (PR), Francisco Guterres Lú Olo, haruka ona pedidu ba Parlamentu Nasionál (PN), kona-ba atu halo viajen ba Indonézia no Japaun.

Prezidente Parlamentu Nasionál (PPN), Arão Noé de Jesus da Costa Amaral, haktuir pedidu Prezidente Repúblika lori ba Parlamentu iha kuarta semana kotuk.

PPN dehan, iha kinta semana kotuk kedas, reuniaun líder bankada Parlamentár ajenda ona ba iha 30 setembru atu debate pedidu refere iha plenária tanba Prezidente Repúblika nia viajen sei hala’o iha loron 19 to’o 26 outubru, maibé ida ne’e depende hosi desizaun kada bankada.

“Ita hein fali ajenda tuir mai tanba foin dadauk Prezidente Repúblika haruka karta mai hodi husu asentimentu atu viajen ba Indonézia ho Japaun”, hateten Arão Noé ba jornalista sira bainhira partisipa iha programa debate “Lian hosi lian laek” ne’ebé realiza iha Salaun Igreja Hosana Bebora, Dili, sábadu (21/9).

Arão Noé esplika, Parlamentu Nasionál órgaun ida ne’ebé deliberativu, tan ne’e desizaun hotu-hotu kabe ba desizaun plenária.

Tanba ne’e, nia dehan bebeik ona katak Prezidente Parlamentu Nasionál hanesan moderadór nune’e desizaun hotu-hotu kabe ba plenária tuir deputadu sira-nia desizaun.

“Ha’u lakohi komenta ba ida ne’e tanba ne’e la’ós kompeténsia Prezidente Parlamentu Nasionál nian atu komenta”, nia tenik.

Xefe Estadu husu autorizasaun ba Parlamentu Nasionál tanba simu konvite hosi Estadu Indonézia kona-ba serimónia pose Prezidente Repúblika Indonézia eleitu iha Jakarta.

Nune’e mós, Xefe Estadu nia viajen ba Japaun atu partisipa iha serimónia imperadór Japaun nian.

Jornalista: Evaristo Soares Martins

Jornalista: Xisto Freitas

HAKEREK NO HATÁN

Please enter your comment!
Please enter your name here