Polisia Nasional Timor Leste kaptura membru Koliamao 2000 nain rua ne'ebé deskonfia envove iha konfrontu ho grupu joventudi sira iha Aimutin hodi hamate membru Kolimau 2000 ida mate iha fatin iha area Aimutin, Segunda 23 Setembru 2019. Imajen/Eugenio Pereira

DILI, 23 setembru 2019 (TATOLI)-Ospitál Nasionál Guido Valadares (HNGV), simu ona mate isin ida ho ema na’in rua ne’ebé kanek tanba kazu konfrontu malu iha Ai-mutin.

“Autópsia ohin loloos atu halo, ohin kedas. Infelizmente ekipa forense patolojia ne’ebé atu halo autópsia ne’e seidauk kompletu. Tanba iha na’in rua sei ba hela distritu ba haree asuntu forense ida iha distritu. Tanba ida ne’e, autópsia ne’e ita muda ba aban 9 horas dader,” informa Xefe Departamentu Forense Patolojia, dr. Nilton Tilman ba Ajénsia TATOLI, iha HNGV, ohin.

Xefe Departamentu Forensik Ospitál Nasionál Guido Valadares (ONGV), Nilton Tilman. Imajen Jogerjo Guterres

Médiku timoroan ne’e garante aban autópsia prosedimentu forense hotu. “Aban kompletu hotu, bele halo hotu”.

Doutór Nilton Tilman haktuir tan, ko’alia ona ho família no komunikasaun di’ak tebes ho família. “Ami-nia komunikasaun di’ak ho família, sira mós koopera tebes, ita apresia ba ida ne’e”.

“Ha’u fó ona garantia ba sira katak, aban autópsia sei la’o no prosedimentu forense hotu ne’ebé mak tribunál hakarak no família mós deseju sei halo hotu no entrega hotu iha aban,” tenik dr. Nilton Tilman.

Iha biban hanesan, Xefe Departamentu Forense Patolojia, dr. Nilton Tilman informa katak akontesimentu iha Ai-mutin ne’ebé mak simu iha ospitál ne’e mate isin ida, ho ema na’in rua kanek, ida iha ICU (Intensive Care Unit), ida fali sei iha hela tratamentu iha emerjénsia atu mai iha salaun baixa nian.

“Ita la hatene, depois ita haree progresu ne’e la’o hanusa se nia todan, nia bele mai hotu ICU, sei nia ladún todan, nia mai iha kaman, orsida ita sei trata nia iha salaun jerál hanesan baibain nian; na’in tolu ne’e mane hotu,” hateten dr. Nilton Tilman.

Iha parte seluk, família Matebian Ivonio da Silva sente triste ho akontesimentu ne’ebé akontese iha Ai-mutin hodi rezulta Ivonio da Silva hakotu iis, iha fatin akontesimentu.

“Sente triste tebes tanba lakon ona alin ida hanesan ho ha’u, ami na’in rua mak tuir malu, triste tebes tanba ohin dadeer sei hamutuk, to’o fali setengah 9 dadersán nia hakotu iis. Sente tristeza tebes tanba lakon ona alin,” dehan Evangelino da Conçeição Silva, nu’udar matebian nia maun ho triste.

Nia akresenta, seidauk rona kazu ne’e loloos: “Husi família de’it seidauk rona kazu loloos. Oinsá ita hetan rezultadu husi autópsia atu identifika loloos kazu ida ne’e”.

Hatán ba pergunta kona-ba lori kazu ne’e ba justisa, Evangelino da Conceição Silva hatán: “Sim, ne’e tenke presiza, tanba iha ema ida hakotu ema ida nia destinu tanba liuhusi autópsia mak identifika hetan duni ema oho tanba ita haree ho matan rasik ema oho duni”.

Notísia relevante:Polísia Detein Ona Suspeitu Na’in Rua Ba Kazu Konfrontu Ai-mutin

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here