Unidade Polísia Espesiál hosi PNTL asegura seguransa, hafoin akontese konfrontu entre joven sira iha Ai-mutin ho grupu Kolimau 2000, ohin. Imajen António Gonçalves

DILI, 23 Setembru 2019 (TATOLI) – Polísia Nasionál Timor-Leste (PNTL), ohin detein ona suspeitu na’in rua ba asaun konfrontu entre grupu Kolimau 2000 ho joven sira iha Ai-mutin, ne’ebé rezulta joven ida, Ivon da Silva, mate iha fatin akontesementu.

Komandante Unidade Espesiál Polísia (UEP), Superintendente Xefe Afonso dos Santos, koordena kedas ho Polísia Militár inklui Ofisiál Polísia Suku (OPS) koloka kedas membru hodi asegura.

“Ohin kedas polísia UEP no Polísia Militár tenke halo seguransa másima para normaliza situasaun seguransa iha ne’e para povu nia atividade negosiu kontinua la’o”, afirma Komandante iha Ai-mutin hafoin asegura situasaun.

Asaun krime ne’e rezulta mós Mário Ricardo, estudante Universidade Pás hetan tuda iha ulun.

Tuir kronolojia, grupu arte-rituál Kolimua 2000 ho masa besik rihun, ho karreta fila husi selebrasaun misa agradesimentu inagurasaun Gruta Sagrado Coracão de Jesus iha Taibesi Dili liu too área Ai-mutin (fatin fa’an ropa uzadu/ropa obralan) suku Komoro, postu administrativu Don Aleixo, munisípiu Dili derrepente mosu provokasaun tuda malu, ikus mai rezulta vítima Mário Ricardo hetan sona iha parte hirus matan.

Matebian Ivon da Silva, estudante Ensinu Sekundáriu Nobel da Pás. Enkuantu, Mário Ricardo, agora daudaun hetan ona tratamentu hosi pesoál saúde sira iha Ospitál Nasionál Guido Valadares (HNGV-sigla portugés).

Akontesimentu ne’e halo populasaun inklui negosiante sira ne’ebé hala’o hela atividade fa’an ropa uzadu trauma hodi hapara sira ni’an movimentasaun.

Tuir sasin, Marito Pereira, deklara ba polísia, konfrontu ne’e akontese tanba mosu  provokasaun husi estudante balun hasoru grupu Kolimau 2000 iha estrada ibun hodi halo grupu sira hirus asalta tama área Ai-mutin ni’an.

“Ami haree de’it grupu sira ne’e ho karreta liu mosu provokasaun husi estudante sira, depois mak grupu sira ne’e ho ema barak tun iha karreta leten foti fatuk tuda malu, agora kona-ba ida mate ne’e ami la haree sé maka oho ne’e ami la hatene”, tenik nia.

Fatin hanesan, Xefe Suku Komoro, Eurico de Jesus, dehan vítima ida ne’ebé mate, la’ós populasaun husi parte Ai-mutin ni’an, maibé ema husi li’ur.

Xefe Suku ne’e mós hamutuk ho Polísia Nasionál Investigasaun Kriminál (PNSIK) halo kedas entrevista ho parte sasin hodi rekolla informasaun.

Parte seluk, Komandante Komandu Polísia Munisípiu Dili, Superintendente Xefe Armando Monteiro, rekoñese prezensa grupu Kolimau 2000 besik rihun 12 mai Dili hodi partisipa  misa inagurasaun ba Grupu Sagrado Coracão de Jesus iha Taibesi Dili ne’ebé inagura husi Bispu Dioseze Dili, Virgilio do Carmo da Silva SDB, iha domingu (20/09).

Jornalista: Eugénio Pereira

Editora: Rita Almeida

HAKEREK NO HATÁN

Please enter your comment!
Please enter your name here