Matebian Amu João de Deus, SDB. Imajen/Espesiál

DILI, 22 setembru 2019 (TATOLI)- Antigu alunu Salezianu Dom Bosco, Inacio Moreira hateten Padre João de Deus Pires nia misaun durante mai iha Timor-Leste tempu naruk, hanorin ona joven sira no agora daudaun matenek barak ona iha nasaun ne’e.

“Ha’u hakarak lori salezianu Dom Bosco nia naran hato’o sentidu kondolénsia, kongregasaun salesianu ne’ebé lakon misionáriu ida ne’ebé importante ba nasaun Timor-Leste no mós ha’u lori antigu alunu nia naran hato’o obrigadu ua’in ba ema hotu-hotu ne’ebé fó tulun nia, ajuda nia durante nia moras,” hateten Antigu Alunu, Inacio Moreira ba jornalista sira iha HNGV, ohin.

“Liuliu ba Governu Timor-Leste ne’ebé fó tulun no ami antigu alunu hato’o agradese ua’in,” reforsa tan antigu alunu ne’ebé mós halo akompanamentu ba matebian Pe. João de Deus nia moras durante ne’e.

Nia hateten, tinan ida ne’e, amu lulik salezianu ne’e kompleta tinan 92 ho nune’e katuas ona no mós Maromak nia planu no moris mak sai nune’e nia ba ona Maromak nia kadunan santo.

“Moras padre João de Deus ninian, ho esforsu hotu-hotu halo maibé labele tanba ne’e ita reza atu nune’e nia klamar ba na’in Maromak nia kadunan santo no nia iha ne’ebá, ita bele harohan hodi tulun nafatin ita sira ne’ebé sei moris hela no ita agradese ba nia sakrifísiu tomak durante ne’e Timor-Leste sai indepedénsia”.

Notísia relevante:In Memoriam: Pe. João de Deus, “Cala-te e Vai”

Jornalista : Felicidade Ximenes

Editór.        : Rafy Belo

HAKEREK NO HATÁN

Please enter your comment!
Please enter your name here