Padre João de Deus. Imajen espesiál

DILI, 22 setembru 2019 (TATOLI)—Padre João de Deus Pires, SDB, hakotu ona iis iha Hospital Nacional Guido Valadares (HNGV), Bidau Toko Baru, Dili, domingu ne’e, tuku 16:40 otl.

Padre seniór Salezianu iha Timor ne’e hala’o tratamentu saúde iha HNGV dezde 31 agostu liubá. Antes ne’e, Amu João hala’o uluk tratamentu saúde iha Malázia maibé la pasa tanba moras ne’ebé Nai-Lulik ne’e infrenta komplikadu.

Lee mós: Xefe Estadu Vizita Padre João de Deus iha ICU HNGV

Médiku  ICU HNGV, doutór Vong ne’ebé halo tratamentu ba Padre João de Deus, esplika pasiente sofre moras komplikasaun tanba ne’e durante iha Intensive Care Unit (ICU), médiku sira halo tratamentu ba antí infesaun no mós tratamentu atu suporta órgaun sira ne’ebé hanesan tratamentu kritériu no laiha opsaun seluk.

Nune’e mós, Diretór Apoiu Diagnóstiku no Terapeútika HNGV, Mendes Pinto,  esplika Padre João de Deus sofre moras oioin ne’ebé bolu komplikasaun inklui lakon sentidu ka lahatene tuir-aan, nune’e mós haree ba idade (tinan 91 ona).

Médiku ne’e informa katak HNGV la hanoin atu transfere Padre ne’e ba halo tratamentu ba rai li’ur tanba iha rai li’ur mós sei halo tratamentu hanesan ho HNGV halo.

Mate isin hosi Amu Salezianu oras ne’e sei hatuur hela iha Mortuáriu HNGV no la kle’ur tan sei lori ba hatuur iha Sentru Formasaun Don Bosco Comoro. Tuir planu, aban (23/9), sei lori Padre  ba Fatumaca, Gariuai, Baucau, hodi submete ba prosesu fúnebre.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here