Prezidente Repúblika, Francisco Guterres Lú Olo, Guterres vizita Padre João de Deus iha sala ICU HNGV, segunda (9/9). Imajen/ Cipriano Colo

DILI, 09 Setembru 2019 (TATOLI) – Prezidente Repúblika (PR), Francisco Guterres Lú Olo, akompaña hosi ninia Espoza, Cidália Lopes Nobre Mouzinho Guterres vizita Padre João de Deus Pires, SDB, ne’ebé baixa iha sala Intensive Care Unit (ICU), Hospital Nacional Guido Valadares (HNGV).

“Ha’u mai vizita Padre João de Deus, ne’ebé mak tama iha ospitál ida ne’e iha semana kotuk, ho kondisaun grave, maibé ita-nia doutór sira tau-matan nafatin ba nia hodi haree komesa rekupera uituan”, tenik PR, segunda ne’e iha HNGV.

Xefe Estadu dehan, tuir doutór sira bainhira kondisaun Padre di’ak, presiza haruka sai ba rai li’ur, maibé ho kondisaun agora labele.

Iha tempu hanesan, Lú Olo vizita mós Veteranu José Gusmão Mau Mesak (Kaer Susar) ne’ebé baixa mós iha HNGV.

Iha fatin hanesan, Médiku  ICU HNGV, doutór Vong ne’ebé halo tratamentu ba Padre João de Deus, hateten pasiente sofre moras komplikasaun tanba ne’e durante iha ICU médiku sira sei halo tratamentu ba antí infesaun no mós tratamentu atu suporta órgaun sira, ne’ebé hanesan tratamentu kritériu no laiha opsaun seluk.

Nune’e mós, Diretór Apoiu Diagnóstiku no Terapéutika HNGV, Mendes Pinto,  informa Padre João de Deus tama iha HNGV iha loron 31 agostu, tanba sofre moras oioin ne’ebé bolu komplikasaun inklui lakon sentidu ka lahatene tuir-aan, nune’e mós haree ba idade (tinan 91 ona).

Médiku ne’e haklaken HNGV la hanoin atu transfere Padre ne’e ba halo tratamentu iha rai li’ur tanba iha rai li’ur mós sei halo tratamentu hanesan ho HNGV halo.

Nune’e, parte ospitál mós esplika ona situasaun ne’e ba Padre Vigário Jerál Dioseze Dili no Padre sira inklui antigu alunu Don Bosco no kompriende kona-ba situasaun ne e.

Jornalista : Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here