Emprezáriu timoroan, Rui Castro

DILI, 21 setembru 2019 (TATOLI) – Prezidente Movimentu Asaun Ekonomia Komunitária (MAEKOM), Rui Castro, hatete nia parte garante katak manu broiler ne’ebé maka dadaun ne’e promove bele domina merkadu nasionál.

“Tinan ne’e MAEKOM sei okupa porsentu 10 no iha planu estratéjiku MAEKOM iha 2020 sei domina porsentu 20 no 2021 MAEKOM sei okupa merkadu nasional 40 to’o 60 pursentu”, dehan nia ba TATOLI bainhira halo lansamentu ba manu broiler iha Suku Aubeon, Postu Administrativu Natarbora, Munisípiu Manatutu, ohin.

Tanba ne’e, MAEKOM rasik iha akordu ho BNCTL hodi fó kréditu ba parseiru (mitra) MAEKOM nian hodi aumenta volume ba nessesidade iha merkadu.

Nia dehan grupu MAEKOM la’ós atu hakiak de’it manu, maibé mós kuda modo depois fa’an no hakiak animál no seluk tan.Tanba MAEKOM mós prepara hela indústria ki’ik ne’ebé sei simu produtu balun.

Emprezáriu timoroan ne’e informa iha outubru MAEKOM mós sei hatama manu-rade nia tolun me’ebé sei distribui ba munisípiu hotu.

“MAEKOM nia target loos atu lori negósiu ba iha povu hodi bele lori família ida, negósiu ida”, dehan Rui Castro.

Eis Prezidente Repúblika, José Ramos Horta, dehan manu ida ne’e kualidade di’ak bainhira konsome tanba la kahur ho ai-moruk oioin hanesan ayam potong.

Horta hatutan manu broiler ne’e produtu subtituisaun iha merkadu hodi ajuda ekonomia rai-laran. “Parabéns ba MAEKOM ho nia membru no ha’u rasik sei sai konsumidór ba produtu MAEKOM”.

MAEKOM aliña ona nia planu ho Planu Estratéjiku Dezenvolvimentu Nasionál Timor-Leste 2011-2030 ho objetivu atu eradika ki’ak, garante seguransa alimentár no hasa’e kreximentu ekonomia liuhusi setór agrikultura (PEDN, 2011). Nune’e, MAEKOM sei hasa’e númeru hakiak manu-frangu no investe tan iha setór agríkola sira seluk hodi responde merkadu iha área rurál, munisípiu no nasionál.

Movimentu Asaun Ekonomia Komunitária (MAEKOM) nu’udar grupu ida ne’ebé kompostu husi timoroan sira ho profisaun no esperiénsia oin-oin ne’ebé iha kompromisu atu garante dezenvolvimentu ekonomia iha Timor-Leste, liu-liu iha setór produtivu agríkola nian, nune’e bele hakbi’it ekonomia família no kreximentu ekonomia nasaun nian.

Notísia relevante : MAEKOM Kolleita Broiler 2000 iha Natarbora

Jornalista : Natalino Costa
Editora : Maria Auxiliadora 

HAKEREK NO HATÁN

Please enter your comment!
Please enter your name here