Eis Prezidente Repúblika Timor- Leste, José Ramos Horta, akompaña husi Prezidente MAEKOM, Rui Castro, halo lansamentu ba kolleita manu broiler hamutuk 2000 iha Suku Aubeon, Postu Administrativu Natarbora, Munisipiu Manatutu, sábadu (21/9/2019). Imajen/Natalino Costa.

NATARBORA, 21 setembru 2019 (TATOLI)-Movimentu Asaun Ekonomia Komunitária (MAEKOM) kolleita manu broiler (frangu) 2000 iha suku Aubeon, Postu Administrativu Natarbora, Munisípiu Manatutu, ne’ebé mak atividade ne’e lansa husi eis Prezidente Repúblika, José Ramos Horta.

Xefe Suku Aubeon hanesan mós Koordenadór MAEKOM iha fatin refere, Domingos Gonzaga, hatete abitante suku Auboen hahú tau interese hola manu-frangu duké ayam potong.

“Sira komesa hakarak hola manu broiler tanba konsome ne’e di’ak”, dehan nia iha ámbitu lansamentu frangu husi MAEKOM iha suku Aubeon, Natarbora, ohin.

“Hafoin halo tiha kolleita ba manu broiler rasik, ami sei fa’an bá merkadu dahuluk hamutuk 1000”, dehan koordenadór ne’e.

Hodi hatutan merkadu la’ós de’it iha suku, maibé husi grupu sei esforsu hodi to’o Iha Munisipiu Manatutu, Same no Vikeke.

“Ami sei ko’alia ho MAEKOM rasik atu haree manu broiler nian merkadu hafoin lansamentu iha suku ida ne’e, tanbá ami iha ona inisiativa atu fa’an 1000 ba merkadu”, katak nia.

Tanba nee presiza MAEKOM nia tulun no bá oin bele haforsa komunidade nia ekonomia. “Ami husu ba MAEKOM, aléinde haki’ak manu broiler, se bele sira apoia haki’ak Karau no seluk”, autoridade ne’e sujere.

Iha fatin hanesan, Pedro do Santos, rezidente iha suku ne’e espresa nian sentimentu kontente tanba manu-frangu ne’e foin ba dahuluk komunidade suku Aubeon iha.

“Ida ne’e esforsu grupu MAEKOM atu povu bele husik produtu importadu sira durante ne’e hanesan ayam potong”, katak.

Nune’e nia husu ba MAEKOM atu insentiva grupu hakiak manu ne’e atubele fa’an barak ba komunidade.

Prezidente MAEKOM, Rui Castro, hateten MAEKOM rasik kontinua esforsu hodi fó prioridade ba diversifikasaun ekonomia Timor-Leste nian no kona-ba merkadu ba broiler iha suku Aubeon labele dúvida.

Maski foin kolleita manu iha suku ne’e 2000, ne’e sei bele fó han ba komunidade iha suku no Natarbora tomak no Vikeke tantu Same-Fatuberliu.

Horta Apresia MAEKOM

Eis Prezidente Repúblika, José Ramos Horta, ne’ebé lansa atividade kolleita manu broiler ne’e apresia ho MAEKOM ne’ebé lidera husi emprezáriu Rui Castro tanba komesa halo diversifikasan ekonomia iha Timor-Leste.

“Ha’u kontente tebetebes no admira inisiativa ne’ebe Rui Castro ho nia grupu MAEKOM halo tanba bele dudu ekonomia iha Timor-Leste”, Horta afirma.

“Buka dezenvolve ekonomia lokál ho rekursu ne’ebé maka ita iha, la hein ezmola husi Governu”, katak premiadu Nobel Dame ne’e.

Tanba ne’e nia promete sei fó apoiu morál no polítika ba investimentu MAEKOM nian, nune’e bele dudu ekonomia iha país sai di’ak liután.

Jornalista : Natalino Costa 

Editora : Maria Auxiliadora 

HAKEREK NO HATÁN

Please enter your comment!
Please enter your name here