Membru FALINTIL- Forsa Armada Timor-Leste (F-FDTL), simu vizita Almirante Xefe Estadu Maiór Jenerál Forsa Armada Fiji, Contra Dimirante Viliame Naupute ho parade militár iha Kuartél Jenerál F-FDTL, Fatuhada, Dili, sábadu (21/09/2019). Imajen/Eugénio Pereira

DILI, 21 setembru 2019 (TATOLI)-Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timur,  tranzmite preokupasaun Jenerál Forsa Armada Indonézia, Hadi Tjahjanto, ba Almirante Xefe Estadu Maiór Jenerál Forsa Armada Fiji, Contra Dimirante Viliame Naupute, kona-ba pozisaun Fiji apoia Papua atu hetan ukun aan.

Notísia Relevante : Fiji Prontu Apoiu Komponente Navál F-FDTL

Xefe Estadu Maiór Jenerál FALINTIL-FDTL, Majór Jenerál Lere Anan Timur entrega prenda ba Almirante Xefe Estadu Maiór Jenerál Forsa Armada Fiji, Contra Dimirante Viliame Naupute, hafoin enkontru iha Kuartél Jenerál F-FDTL, Fatuhada, Dili, sábadu (21.09/2019). Imajen/Eugénio Pereira

Lere dehan,  iha loron 29 Agusto 2019, bainhira nia hasoru malu ho  Jenerál Forsa Armada Indonézia, Hadi Tjahjanto iha fronteira Mota-ain, Batugadé, Bobonaro, Jenerál Hadi husu ba Governu Timor-Leste no Komandu F-FDTL  atu hato’o hela mensajen ba Fiji katak, Indonézia sente preokupa tebes bainhira Fiji apoia Papua nia asaun demonstrasaun atu hetan independénsia.

Liu husi enkontru ho  Almirante Xefe Estadu Maiór Jenerál Forsa Armada Fiji, Contra Dimirante Viliame Naupute, ohin, iha Kuartél Jenerál F-FDTL, Fatuhada, Dili, Majór Jenerál Lere dehan, mensajen ne’ebé nia belun di’ak Jenerál TNI hato’o liu husi nia hodi hato’o ba Fiji nu’udar mós nasaun belun ho Timor-Leste hato’o ba malu para bele hetan solusaun di’ak, liu-liu atu hametin estabilidade no seguransa iha nasaun ida-idak hodi hetan dame.

Lere dehan, ba Timor-Leste nia haree problema Papua no Timor-Leste nian la hanesan, tanba Papua nia nain mak Repúblika Indonézia mak ukun, no Timor-Leste uluk Portugál maka ukun no fó liberdade ba Timor-Leste hodi ukun aan iha loron 28 Novembru 1975, depois funu mosu liu tiha tinan 24, mai ukun aan iha 20 de Maiu 2000 ne’ebé ONU rekoñese ona.

Antes ne’e iha loron 29 Agostu 2019 liubá, Lere no Jenerál TNI, Hadi hodi diskute kooperasaun defeza atu garante seguransa iha  liña fronteira rai rua.

“Ha’u mós dehan, Timor-Leste nia forsa atu serbisu hamutuk ho TNI para garantia seguransa,” tenik nia.

Nia hatutan, Timor-Leste no Indonézia nu’udar nasaun viziñu sei kontinua hametin nafatin kooperasaun forsa rua hodi promove dame ba mundu.

Jornalista : Eugénio Pereira    

Editór        : Francisco Simões

2 KOMENTÁRIU

  1. Ami Nu’uda Povu no Joventude TL nafatin fo Apoiu ba Povu PAPUA atu hetan Independensia hanesan ms TL, Tamba TL mos uluk Luta ba Independensia hetan apoiu solidaridade husu komunidade Internasional

  2. AMI JOVEN APOIO UKUN RASIK AN BA POVO PAPUA
    TAMBA INDEPENDENSIA TIMOR LESTE MOS HETAN APOIO HUSI KOMUNIDADE INTERNASIONAL
    FREE WEST PAPUA✊

HAKEREK NO HATÁN

Please enter your comment!
Please enter your name here