DILI, 21 setembru 2019 (TATOLI)- Komandu Forsa Armada Fiji sei serbisu hamutuk ho Komandu FALINTIL-Forsa Defeza Timor-Leste (F-FDTL) hodi dezenvolve rekursu umanu Forsa Komponente Navál F-FDTL.
Kometimentu ne’e hato’o husi Almirante Xefe Estadu Maiór Jenerál Forsa Armada Fiji, Contra Dimirante Viliame Naupute, ohin, durante hala’o enkontru ho Xefe Estadu Maiór Jenerál F-FDTL, Majór Jenerál Lere Anan Timur, iha Kuartél Jenerál F-FDTL, Fatuhada, Dili.
Maiór Jenerál Forsa Armada Fiji, Contra Dimirante Viliame Naupute vizita Timor-Leste hodi partisipa iha serimónia selebrasaun tinan 20 prezensa INTERFET (20 setembru 1999-20 setembru 2019).
Iha tinan 1999 Forsa Armada Fiji hola parte mós iha misaun solidariedade dame INTERFET nian fó ona kontribuisaun prosesu harii dame ne’ebé povu Timor-Leste sente too ohin loron.
“Ha’u konvida Xefe Estadu Maiór Jenerál Forsa Armada Fiji, Contra Dimirante Viliame Naupute vizita kortezia hodi hato’o ita nia agradesimentu ba sira nia kontribuisaun iha misaun INTERFET hodi hamenus konflitu no violénsia iha 1999,” hateten Lere Anan Timur.
Majór Jenerál Lere hateten, nia ho Maiór Jenerál Contra Dimrante Viliamen, ko’alia mós kona-ba kooperasaun atu oinsá mak membru F-FDTL bele ba tuir formasaun iha Fiji.
Nia mensiona katak, kooperasaun iha área Navál ne’e importante hodi hasa’e rekursu Forsa Navál Timor-Leste ne’ebé agora prepara atu halo seguransa iha tasi Fronteira Marítima Timor-Leste nian hodi asegura seguransa ba plataforma esplorasaun mina iha tasi laran.
Tinan-tinan jenerál nasaun sira hanesan, Timor-Leste, Fiji, Vanuatu, Papua Nova Giné, Tonga, sempre hasoru malu hodi diskute kooperasaun defeza iha kada nasaun hodi serbisu hamutuk no fahe esperiénsia balu kona-ba oinsá hametin dame iha kada nasaun.
Jornalista : Eugénio Pereira
Editór : Francisco Simões
