Eis Prezidente Repúblika, José Ramos Horta, akompaña husi Ministru Turizmu, Komérsiu no Indústria interinu, Fidelis Manuel Leite Magalhães ho Embaixadór Portugál ba Timor-Leste, José Pedro Machado Vieira, no Asesór Prinsipál MTKI, Jacinto Rigoberto Gomes, haree hela kulinária produtu lokál. Imajen/Florencio Miranda Ximenes.

DILI, 20 setembru 2019 (TATOLI) –  Ministru Turizmu, Komérsiu no Indústria interinu, Fidelis Manuel Leite Magalhães,  hatete liuhosi atividade “Feira Loraik” bele sukat ona kapasidade timoroan sira nian iha setór kulináriu, artezanatu, dansa kultura hodi bele promove produtu no identidade Timor-Leste (TL) ba mundu.

“Governu nia polítika hakarak duni atu promove, maibé tenke liuhosi atividade feira sira ne’e para ita sukat ita-nia abilidade no kapasidade hodi kreativu liután hodi hatudu mós ba mundu,” Ministru Fidelis afirma iha abertura  “Feira Loraik” iha Jardín B. J. Habibie, Bidau Santa Ana, ohin.

Ministru Koordenadór Asuntu Ekonómiku ein ezersísiu ne’e salienta, Timor-Leste presiza duni ona atu promove produtu lokál no kultura ba mundu. Tanba ne’e, presiza halo produsaun barak liután no iha tinan oin (2020) fó atensaun maka’as ba setór agrikultura no peska, turizmu  no infraestutura.

Atu promove produtu no sítiu turístiku ba mundu, nia dehan liuhusi dalan esposizaun mundiál sira ne’ebé Timor-Leste mós sei partisipa iha esposizaun Dubai iha 2020.

Atuál Ministru Reforma Lejizlativa no Asuntu Parlamentár ne’e dehan “Feira Loraik” ne’e atu fó ksolok  ba abitante iha kapitál Dili ne’ebé iha tinan 20 (1999) ba kotuk tanis no laran susar, maibé iha selebrasaun tinan 20 (2019) bele kontente hamutuk.

“Iha tinan 20 ba kotuk hetan ahi suar, labarik barak tanis no triste, halai lakon no sofre inklui terus. Agora, tinan 20 liu tiha ita mai hamutuk selebra ho kontente”, katak Ministru Fidelis.

Iha fatin hanesan, Diretór Jerál Ministériu Turizmu, José Filipe Dias Quintas, dehan “Feira Loraik” ne’e importante atu promove produtu lokál, kulinária, artezanatu, kultura, inklui diretamente fó benefísiu ekonómiku ba negosiante no transporte públiku sira.

Nia afirma eventu “Feira Loraik” ne’e durante fulan ida nia laran, tanba ne’e importante mós atu asegura pás no estabilidade.

Komandante Polísia Munisípiu Dili, Armando Monteiro, realsa  atividade ne’e mós fó oportunidade ba joven sira atu hahú hakribit violénsia no konflitu hodi kontribui ba pás no estabilidade.

“Tempu ona atu joven sira hapara konflitu ne’ebé fó risku ba futuru. Ne’ebé aproveita aportunidade ne’e hodi hatudu imi-nia talentu no kreatividade sira”, sujere.

Negosiante artezanatu, Maria Olinda, kontente hodi partisipa feira loraik ne’e tanba bele fa’an nia tais no sasán seluk ba vizitante sira. “Ami kontente tebes ba programa Governu ne’e,” katak.

Feira ne’e realiza tanba Ministériu Turizmu, Komérsiu no Indústria (MTKI) liuhosi Diresaun Empreendimentu,  Atividade Produtu Turístiku koopera ho Polísia Nasionál Timor-Leste (PNTL), Protesaun Sivil no Autoridade lokál munisípiu Dili.

Espozisaun ne’e sei hala’o kada semana dala rua iha loron sesta no sábadu iha tuku haat loraik ho durasaun fulan ida, hahú husi loron  20 setembru to’o 20 outubru tinan ne’e. Feira ne’e realiza ho orsamentu rihun $35.

Espozisaun ne’e aliña ba komemorasaun tinan 20  Misaun INTERFET (Forsa Internasionál ba Timor-Leste) hodi hanoin hikas fali istória iha pasadu atu hakat bá oin hodi promove sítiu turístiku sira iha Timor-Leste.

Partisipa iha abertura feira ne’e mak eis Prezidente  Repúblika, José Ramos Horta, Sekrétariu Estadu Komunikasaun Sosiál, Merício Juvinal dos Reis “Akara”, Sekrétariu Estadu Ambiente, Demétrio do Amaral no Embaixadór Portugál ba Timor Leste, José Pedro Machado Vieira no abitante iha kapitál Dili.

Notísia relevante : Aban, Abertura “Feira Loraik” Iha Jardín B.J. Habibie

Jornalista : Florencio Miranda Ximenes  
Editora : Maria Auxiliadora

HAKEREK NO HATÁN

Please enter your comment!
Please enter your name here