Aban, Abertura “Feira Loraik” Iha Jardín B.J. Habibie

Asesór Prinsipál MTKI, Jacinto Rigoberto (Klaran) hamutuk ho Komisaun Organizora Hala’o Konferénsia Imprensa kona-ba Feira Lokraik iha Jardim B.J. Habibie hodi komemora tinan 20 Loron INTERFET, iha salaun Sentru Konvensaun Dili (CCD). Kinta,(19/09/2019). Imajen/Tatoli.

DILI, 19 setembru 2019 (TATOLI) – Ministériu Turizmu, Komérsiu no Indústria (MTKI) liuhosi Diresaun Empreendimentu, Atividade Produtu Turístiku, koopera ho Polísia Nasionál Timor-Leste (PNTL), Protesaun Sivíl no autoridade lokál munisípiu Dili, aban, realiza “Feira Loraik” iha Jardín B.J. Habibie, Bidau Santa Ana.

“Feira Lokraik” ne’e hahú abertura iha tuku 4:00 no tuir oráriu kada semana halo dala rua iha sesta no sábadu ho durasaun durante fulan ida hahú husi loron 20 setembru to’o 20 outubru tinan ne’e. Atividade ne’e realiza ho orsamentu rihun $35.

Diretór Jerál Turizmu, José Filipe Dias Quintas. Imajen/Tatoli.

“Ita realiza eventu feira lokraik ne’e nu’udar atividade ne’ebé aliña ba komemorasaun tinan 20 Misaun INTERFET (Forsa Internasionál ba Timor-Leste) hodi hanoin hikas fali istória hodi ba oin bele promove sítiu turístiku sira iha Timor-Leste”, Diretór Jerál Ministériu Turizmu, José Filipe Dias Quintas, liuhosi konferénsia imprensa, iha Sentru Konvensaun Dili, ohin.

Diretór José Quintas husu ba abitante iha kapitál hodi bele asiste “Feira Lokraik” ne’e, maibé importante tenke kria pás no estabilidade iha ámbitu espozisaun ne’e.

“Ami husu populasaun tomak atubele ba asiste, maibé tenke asegura aan atu labele hamosu konflitu, asegura mós fasilidade iha sítiu ne’e inklui labele soe lixu arbiru”, katak nia.

Diretora Nasionál Empreendementu Atividade Produtu Turistiku, Maria Ernestina Lopes.

Iha fatin hanesan, Diretora Nasionál Empreendimentu, Atividade Produtu Turístiku, Maria Ernestina Lopes, hateten feira lokraik ne’e sei promove produtu lokál, artezanatu, no dansa tradisionál.

“Ita sei promove ai-han lokál ne’ebé restaurante sira te’in, negosiante sira iha área Bidau Santa Ana atu fa’an sasán, fundasaun sira ne’ebé iha kriatividade ba artezanatu no dansa tradisionál sira”, Ernestina dehan.

Nia afirma, daudaun ne’e grupu ne’ebé rejistu ona hamutuk 70 atu promove no fa’an sira-nia sasán iha feira ne’e, maibé sei uza sistema rotativu.

“Ita-nia fatin ki’ik, entaun ami sei uza sistema rotativu atu negosiante sira bele troka malu hodi fa’an nia sasán sira iha feira ne’e”, katak nia.

Komandante Polísia Nasionál Timor-Leste, Munisípiu Dili, Armando Monteiro, informa parte Polísia prontu atu fó seguransa ba feira lokraik ne’e hodi kria pás no estabilidade.

Jornalista : Florencio Miranda Ximenes

Editora : Maria Auxiliadora