Jenerál Peter John Cosgrove ne'ebé lidera misaun INTERFET iha Timor tinan 1999. Imajen/Tatoli.

DILI, 20 Setembru 2019 (TATOLI)- Ami mai hodi ajuda ita-bo’ot sira (timoroan) maibé ita-bo’ot sira fó inspirasaun mai ami. Ami mai iha ne’e hodi halo kna’ar militár maibé ami fila, ami sente diferente no di’ak liu tanba ami simu tiha imi-nia konfiansa no hadomi ami-nia kna’ar nakfilak hanesan priviléjiu.

Liafuan hirak ne’e hato’o husi Eis-Komandante, Peter John Cosgrove, iha nia diskursu iha komemorasaun aniversáriu ba dala 20 INTERFET-Forsa Manutensaun pás, iha Palácio do Governo, ohin.

Eis-Komandante INTERFET ne’e agradese tebes ba onra ne’ebé Timor-Leste fó ba sira. “Tinan 20 depois ami fila fali mai Timor-Leste, ami kontente marka prezensa iha ne’e hodi deseja ita bo’ot sira di’ak no agradese ita-bo’ot sira ba onra ita-bo’ot sira lori mai ami. Maibé partikularmente ami agradese maneira ne’ebe ita-boot sira simu tinan 20 liubá,” tenik Peter John Cosgrove.

Iha biban ne’e, Veteranu Australianu, Peter John Cosgrove hatutan, sira mós sente triste ba sofrimentu ne’ebé Timor-Leste enfrenta.

“Iha misaun INTERFET iha mundu tomak ami haree saida maka povu Timor-Leste sofre iha tinan 1999 inklui violénsia milisia nian, ahi sunu no mate. Iha ami nia fuan ami senti triste, eventu sira la tuir kódigu morál ami-nia sensibilidade iha momentu ne’ebá ami hakarak ajuda”.

Nia reforsa, membru forsa barak husi forsa Austrália, nasaun primeiru entre nasaun 22 iha INTERFET nia laran sira sente ta’uk no hakfodak kona-ba situasaun ida ne’e.

“Maibé sira depende fali ba sira-nia formasaun, ba sira nia orgullu iha formasaun ida ne’e no iha sira-nia konfiansa ba malu,” Eis-Komandante, Peter Cosgrove dehan.

Iha diskursu, Eis-Komandante INTERFET ne’e mós hato’o agradesimentu ba nia maluk INTERFET sira tomak husi nasaun 22 ne’ebé hamutuk ho nia iha tinan 1999.

“Ha’u agradese ba sira ida-idak husi nasaun 22 ne’e hotu. Maibé INTERFET iha momentu imi-nia istória la’ós kona-ba deit nasaun 22 ne’e maibe kona-ba nasaun ida de’it, Timor-Leste”.

Peter mós, iha biban ne’e, rekoñese aten-brani husi povu Timor-Leste nian hodi ultrapasa dezafiu bo’ot ne’e.

“Hodi naran forsa INTERFET ho ema rihun sanulu resin ida atus lima ha’u hakarak dehan ba povu Timor-Leste, ami haree imi-nia sofrimentu maibé ami haree imi-nia korajen, ami haree imi-nia destruisaun maibé ami mós haree imi-nia determinasaun hodi konstrui fali no ultrapasa dezafiu, ami haree imi-nia triste maibé ami mós haree imi-nia otimista no imi-nia alegria uainhira imi haree ba futuru ho esperansa,” nia konklui.

Notísia relevante:Peter Cosgrove Konsidera Timór Iha Mudansa Hafoin Tinan 20

Jornalista: Nelia Borges

Editór.       : Rafy Belo 

HAKEREK NO HATÁN

Please enter your comment!
Please enter your name here