DILI, 20 setembru 2019 (TATOLI)-Eskola Sekundária Téknika Vokasionál ESTV-GTI (Grupu Tékniku no Indústria) Becora, realiza uluk Prova Aptidaun Profisionál (PAP) ba estudante finalista na´in 337 molok hakat ba partisipa iha ezame nasionál, nu´udar tradisaun ida ne’ebe sempre hala’o iha ESTV-GTI hodi haree kapasidade no abilidade estudante ne’e nian.

Diretór da Eskola ESTV-GTI, Becora Francisco Guterres hateten prova aptidaun ne’e konsidera nudar mini teze, ne’ebé atu termina futuru estudante nian.

Mezmu ezame nasionál ne’e termina estudante ESTV-GTI ho valór di´ak maibé Prova Aptidaun Profesionál mak estudante finalista ne’e hetan de’it valór kuatru, parte eskola konsidera reprovadu, tenik Diretór Francisco Guterres ba Ajénsia TATOLI iha ninia kna’ar fatin ESTV-GTI, ohin.

PAP ne’e, tuir Diretór Francisco Guterres katak sei realiza iha loron 27 setembru 2019 atu ezije estudante finalista sira hatudu sira-nia badaen ka abilidade. PAP ne’e estudante sira sei aprezenta kada grupu tanba iha Timor-Leste seidauk iha indústria
maibé ba futuru mak indústria barak ona iha Timor-Leste, entaun ESTV-GTI sei halo kada estudante.

Ne’e kritériu ka regra ida loloos ne’ebé komunga iha eskola téknika vokasionál sira atu nune’e bele fó biban ba kada estudante atu prepara ninia an ho didiak, nia informa.

Manorin na´in ESTV-GTI ne´e hatutan tan katak depois kuandu estudante fnalista sira hatudu tiha sira nia abilidade sei iha profesór ezaminadór atu haree teze ne’ebé sira aprezenta. Kuandu aprezentasaun ne’e tama iha konsiderasaun eskola sei fasilita sertifikadu hodi rekoñese estudante sira-nia badaen no abilidade ne’e.

Molok matéria ne’ebé estudante sira aprezenta ne’e modelu monografia entaun tenke prodús ona ba makalah hodi bele fasilita ezaminadór sira atu akompaña aprezentasaun sira ne’e. Monografia ne´e sei rai iha eskola nu´udar referénsia ida ba futuru.

Karik husi rezultadu ikus estudante sira hetan valór pozitivu, sei hetan sertifikadu nivel dois husi eskola no mos diploma husi Ministeriu Edukasaun Juventude e Desportu (MEJD) atu nune’e ba sira bele utiliza hodi kontinua formasaun ba iha SENAI no buka servisu, nia konsidera.

Notísia relevante:Estudante 53,101 Sei Partisipa Ezame Nasionál  

Jornalista : Tomé Amado
Editór        : Rafy Belo

HAKEREK NO HATÁN

Please enter your comment!
Please enter your name here