Sekretáriu Estadu ba Protesaun Sivíl, Alexandrino Xavier de Araújo. Imajen/António Goncalves

DILI, 19 setembru 2019 (TATOLI)-Vítima dezastre naturaís hamutuk uma kain 142 iha Munisípiu Baucau, simu ona apoiu materiál konstrusaun  husi Governu ne’ebé distribui diretamente husi Sekretáriu Estadu Protesaun Sivíl, Alexandrino de Araújo, ho ekipa diresaun jestaun dezastre Nasionál no Munisípiu.

Notísia Relevante: Governu Sei Distribui Apoiu ba Vítima Dezastre Uma Kain 1.881

Materiál konstrusaun ne’ebé maka benefisiáriu sira simu ona kompostu husi kalén tahan 50, simente saka 25, pregu, ai kuadradu, inklui osan mão de Obra $150.

Tuir informasaun ne’ebé TATOLI rekolla husi kronolojia Facebook ofisiál Sekretáriu Estadu Protesaun Sivíl, ohin, relata distribuisaun ne’e hala’o iha Postu Administrativu Baucau Villa,  hahú iha loron 17-18 setembru 2019.

Ba benefisiáriu 142 ne’ebé fahe ba kategoria estragus total hamutuk uma kain 33, estragus natoon 72 no estragus kaman 37 ne’ebé afetadu hahú kedas iha 2017-2019.

Iha Tersa (17/09/2019), Governu hala’o mós distribuisaun material konstrusaun ba vítima dezastre naturaís  hamutuk uma kain 122 iha Postu Administrativu Baguia no iha loron tuir mai Kuarta (18/09/2019), distribui apoiu hanesan ba  vítima dezastre naturaís iha Postu Administrativu Laga, Vemasse no Quelicai.

Iha okaziaun ne’e, Sekretáriu Estadu Protesaun Sivíl esklarese prosesu distribuisaun materiál tarde tanba prosesu tenderizasaun maka atraza hodi afeta ba prosesu distribuisaun ne’e.

Mezmu nune’e, Governante ne’e agradese ba kooperasaun serbisu  husi Prezidente Autoridade Munisípiu, Xefe Suku, Aldeia, Polisia  no Diresaun Nasionál Jestaun Dezastre no Munisípiu fó ona apoiu hodi rekolla dadus ho loloos  hodi hetan tulun husi governu.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here