DILI, 13 setembru 2019 (TATOLI)- Sekretáriu Estadu Protesaun Sivíl (SEPS), iha loron 17 setembru 2019, hahú distribui apoiu materiál konstrusaun no osan mão de obra ba vítima dezastre naturaís hamutuk uma kain 1.881 ne’ebé akontese iha munisípiu ualu durante periodu tinan 2018.
Sekretáriu Estadu Protesaun Sivíl, Alexandrino Xavier Araújo, informa, Diresaun Nasionál Jestaun Risku Dezastre sei distribui materiál konstrusaun ho osan mão de obra ne’ebé prevee iha orsamentu transferénsia públika 2019 ho montante $600.000 ba vítima dezastre husi Munisípiu Baucau, Viqueque, Manatuto, Aileu, Ainaro, Manufahi, Covalima no Liquiça.
“SEPS iha OJE 2020 prevee ona orsamentu, tanba ne’e vítima sira ne’ebé seidauk hetan apoiu sei hetan iha faze segundu,” esklarese Alexandrino Xavier Araújo, iha konferénsia imprensa, ohin, iha Caicoli, Dili.
Prosesu pagamentu sei inisia husi Munisípiu Baucau no Covalima iha loron 17 setembru to’o Outubru 2019, depois kontinua ho munisípiu neen seluk.
Dadus husi Diresaun Nasionál Jestaun Dezastre iha 2018 no 2019 rejista vítima dezastre naturaís hamutuk uma kain 2,976. Ba vítima dezastre naturaís ne’ebé akontese iha 2019 sei hetan apoiu iha faze tuir mai.
Vítima dezastre sira ne’ebé nia uma hetan estragus total sei simu kalén tahan 50, pregu kalén kilograma rua, pregu séntimu 7 kilograma haat, pregu séntimu 10 kilograma rua, pregu séntimu 12 iha kilograma rua, besi mile ualu lolon 10, arame kesi besi rolu rua, simentu saka 25.
Ba estragus natoon sei simu kalén tahan 50, pregu kalén kilograma rua, pregu séntimu hitu kilograma haat, pregu séntimu 10 kilograma rua. Enkuantu ba aat kaman sei hetan de’it kalén tahan 50 ho pregu kalén kilograma rua.
Benefisiáriu sira ne’ebé tama iha kategoria estragus total no natoon sei simu osan mão de obra no ai- kuadradu ho montante $368 no estragus kaman sei simu $150.
Jornalista : Nelson de Sousa
Editór : Francisco Simões
