Terminál Tasitolu. Foto/Natalino Costa.

DILI, 18 setembru 2019 (TATOLI) – Ministru Transporte no Komunikasaun (MTK), José Agostinho, hatete iha tempu badak sei ko’alia ho Ministru Defeza no Ministru Interiór interinu Filomeno da Paixão de Jesus, hodi solusiona terminál Tasitolu, nune’e kompañia bele finaliza obra ne’e.

“Ami rua Ministru Defeza sei tuur hamutuk hodi buka solusaun ne’ebé liga ba ita-nia membru forsa sira ne’ebé maka sei iha fatin ne’ebá (terminál Tasitolu) hodi difikulta ita nian prosesu konstrusaun”, dehan nia ba Tatoli iha Ministériu Finansa, ohin.

Ministru salienta orsamentu ba iha konstrusaun terminál ne’e mai husi ezekusaun orsamentu fundu kapitál dezenvolvimentu no karik laiha solusaun ba obra ne’e iha tempu badak, entaun orsamentu ne’e fila ba kofre Estadu.

“Tanba ne’e maka ha’u esforsu ami rua koordena hodi solusiona tiha problema ne’e”, dehan governante ne’e.

Antes ne’e, Diretór Jerál Administrasaun no Finansa MTK, Deonísio de Araújo, hatete obra ba konstrusaun fíziku terminál Tasitolu atinje 80%, maibé hetan difikuldade iha ninian finalizasaun tanba forsa F-FDTL la husik fatin ne’e ba kompañia atu konklui.

Tanba ne’e, hanesan Diretór Jerál Administrasaun ne’ebé toma konta ba prosesu ne’e enkamiña ona informasaun ne’e ba iha Ministru Transporte no Komunikasaun atu rezolve iha nivel polítiku ho Ministru Defeza no Ministru Interiór interinu, Filomeno da Paixão de Jesus, nune’e mós ho Xefe Estadu Maiór Jenerál F-FDTL, Majór Jenerál Lere Anan Timur, nune’e hamutuk hodi rezolve kestaun ne’e, nune’e kompañia ne’ebé toma konta ba obra refere bele konklui lalais konstrusaun terminál Tasitolu.

Notísia relevante : Konstrusaun Terminál Tasitolu Seidauk Bele Finaliza Tanba Hetan Difikuldade

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here