Terminál Tasitolu. Foto/Natalino Costa.

DILI, 17 setembru 2019 (TATOLI) – Diretór Jerál Administrasaun no Finansa Ministériu Transporte no Komunikasaun (MTK), Deonísio de Araújo, informa konstrusaun fíziku terminál Tasitolu atinje ona porsentu 80%, maibé hetan difikuldade iha nia finalizasaun tanba F-FDTL sira uza hela fatin ne’e.

Tanba ne’e, hanesan Diretór Jerál Finansa, toma konta ba prosesu ne’e no enkamiña ona informasaun sira ne’e ba iha Ministru Transporte no Komunikasaun, José Agostinho da Silva, hodi rezolve iha nivel polítiku ho Ministru Defeza no Ministru Interiór interinu, Filomeno da Paixão de Jesus, nune’e mós ho Xefe Estadu Maiór Jenerál F-FDTL Majór Jenerál Lere Anan Timur, nune’e hamutuk hodi rezolve kestaun ne’e atu kompañia ne’ebé toma konta ba obra terminál Tasitolu ne’e bele konklui lalais.

“Ha’u hato’o ona ba Komité Revizaun Orsamentu Polítika nivel tékniku nian no iha ne’ebá prezidente komisaun ne’e hateten mai ha’u ne’e tenke desizaun polítika”, Diretór Jerál ne’e relata ba Tatoli iha Kaikoli, ohin.

Nia esplika razaun tenke rezolve terminál Tasitolu ne’e ho maneira iha nivel polítiku tanba hafoin ekipa tékniku husi MTK halo verifikasaun iha fatin ne’e katak enfrenta problema iha konstrusaun terminál tanba forsa sira uza hela.

“Tanba ne’e team tékniku ne’ebé maka natoon sei ho Ministériu Obra Publika, Transporte no Telekomunikasaun ba haree entaun iha ne’ebá ezijénsia husi F-FDTL haruka atu harii kazerna para sira bele muda ba kazerna ne’e. Ho nune’e, depois kompañia Mar Vermelha ne’ebé maka kaer obra terminál Tasitolu harii tiha kazerna no konklui tiha hodi entrega ba forsa sira hela, depois de ida ne’e, kompañia kontinua halo fali obra kontinuasaun terminál ne’e, F-FDTL la fó fatin tanba eletrisidade iha kazerna ne’e seidauk iha ka seidauk tama”, nia relata.

Ho preokupasaun ne’e, foin daudaun Diretór Jerál Administrasaun no Finansa MTK ne’e halo kedan karta ba Diretór Jerál Eletrisidade no nia konsege orienta nian ekipa téknika eletrisidade nian hamutuk ho tékniku MTK nian rezolve problema eletrisidade iha kazerna forsa sira iha fatin refere, maibé forsa sira lakohi uza tanba sira hakarak nafatin uza fatin iha terminál ne’e.

Tanba ne’e, husi ekipa téknika MTK nian relata ona kestaun ne’e ba iha Ajénsia Dezenvolvimentu Nasionál hodi husu forsa sira husik fatin, nune’e empreza bele finaliza obra terminál, maibé ne’e difisil ADN atu halo.

Tanba fatin ba terminál Tasitolu ne’e forsa sira mai okupa iha parte terminál nia laran kedan no sira halo kedan cube house besik iha terminál nia sorin no ida ne’e difisil atu haruka forsa sira ne’e muda ba kazerna ne’ebé maka kompañia prepara ona tanba ne’e presiza rezolve.

Nune’e Diretór Jerál garante, se problema ne’e rezolve ona no F-FDTL sira muda ba kazerna ne’e, entaun kompañia bele konklui obra ne’e tanba falta de’it buat balun maka seidauk konklui hanesan sanitasaun no wastable, bainhira hotu, 2019 ka inísiu 2020 terminál ne’e bele utiliza ona.

Diretór empreza Mar Vermelha Unipessoal, Lda, Egas Soares, afirma nia parte hatama ona ba relatóriu ba iha na’in ba projetu mak MTK. “Ida ne’e (relatóriu) iha ona sira, ba kestaun seluk ha’u la fó komentáriu”, dehan nia.

Obra terminál Tasitolu ne’e hahú konstrui iha 2014 ho orsamentu husi Konsellu Administrasaun Fundu Infraestrutura (KAFI) ba iha MTK.

Terminál ne’e bele akumula karreta 100 to’o 200 no kompleta kedan ho torre kontrolu ba viatura sira.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here