Prezidente Autoridade Interinu Rejiaun Administrativa Espesiál Oé-Cusse Ambeno (RAEOA) no Zona Espesiál Ekonomia Sosiál Merkadu (ZEESM), Arsénio Paixão Bano. Imajen Tatoli/Egas Cristóvão.

DILI, 18 setembru 2019 (TATOLI) – Rejiaun Administrativa Espesiál Oekusi-Ambenu (RAEOA) ho Zona Espesiál Ekonomia Sosiál Merkadu (ZEESM) hahú iha 2015 to’o 2019 rekolla ona reseita millaun $32.

Tuir Prezidente Autoridade interinu RAEOA, Arsénio Bano, katak reseita ne’e kobre hosi parte sira  hanesan Eletrisidade, Autoridade Alfándega, no mós seluk tan.

“Reseita ne’ebé ami kobre hamutuk millaun $32 ne’e mai hosi EDTL, Alfándega no selu impostu, no seluk tan”, hateten Arsénio Bano hafoin partisipa iha reuniaun Komité Revizaun Orsamentu Polítika (KROP) iha Ministériu Finansa, Aitarak-Laran, ohin.

Kona-ba reseita hosi aeroportu internasionál Rota do Sândalo, Prezidente Autoridade interinu ne’e dehan, to’o agora seidauk barak, tanba foin halo inaugurasaun ba fulan rua.

“Ha’u sente labele husu lai reseita tanba foin inaugura fulan rua liubá, sertifikadu de’it ami seidauk iha. Ne’e preokupasaun ida mós hosi Governu sentrál nian. Ha’u atu dehan primeiru tenke halo hotu nia sertifikasaun internál no sei diskute ho ANATL, no sei presiza sasán barak tan tanba aeroportu internasionál la’ós buat fasil, tenke prepara buat hothotu para depois bele halo Oekusi sai furak, nune’e halo ema iha interese bá no hatama reseita. Ami kobre reseita más seidauk maka’as”, dehan Arsénio.

Autoridade másima RAEOA ne’e dehan, sei esforsu maka’as liután nune’e bele hatama reseita, tanba projetu ne’ebé maka halo iha Oekusi ho kualidade di’ak no sasán ne’ebé maka iha bele dehan investimentu ida ne’ebé seguru.

Aeroportu internasionál Oekusi hahú nia konstrusaun iha 2018 no inaugura hosi Prezidente Repúblika, Francisco Guterres Lú Olo, iha 18 juñu 2019.

Aeroportu “Rota do Sândalo” nia kustu obra pur volta millaun $120 ne’ebé konstrui hosi empreza Wijaya Karya, Tbk (WIKA) hosi Indonézia, ho nia naruk pista metru 2.200, inklui ho nia fasilidade ho kualidade aeroportu internasionál.

Notísia relevante : http://www.tatoli.tl/2019/07/09/raeoa-zeesm-rekolla-reseita-millaun-31/

Jornalista : Antónia Gusmão 

Editora : Maria Auxilidora

HAKEREK NO HATÁN

Please enter your comment!
Please enter your name here