DILI, 16 setembru 2019 (TATOLI)-Iha pakote Orsamentu Jerál Estadu (OJE) tinan fiskál 2020, Tribunal Rekursu (TR) husu tan adisionál millaun $5-resin atu aloka ba konstrusaun Edifísiu Tribunal Distritál Dili ho mós rezidénsia ba juis sir iha Baucau ho Suai.
Notísia Relevante : Konsellu Majistratura “Muda” Juis TDD Nain Haat
Liu husi diskusaun planu orsamentu kada ministériu no órgaun Estadu sira ho Komisaun Revizaun Orsamentu, ohin, iha Ministériu Finansa, Dili, Prezidente Tribunál Rekursu, Deolindo dos Santos, esplika, TR husu tan proposta adisionál millaun $5-resin sei aloka ba konstrusaun edifísiu Tribunál Distritál Dili, rezidénsia ba Juiz sira iha Tribunál Distritál Baucau no Suai.
Alende ne’e, Deolindo dos Santos hateten, sei aloka mós ba reabilitasaun rezidénsia Juiz sira iha Tribunál Distritál Oé-cuse. Inklui, kapasitasaun ba rekursu umanu iha nivel makaer justisa sira.
Antes ne’e, Tribunál Rekursu iha tetu fiskál 2020 prevee inísiu ho de’it millaun $6-resin ne’ebé aloka ba bens serbisu, saláriu vensimentu no kapitál dezenvolvimentu, maibé husi montante ne’e konsidera la sufisiente atu ezekuta tanba ne’e husu tan adisionál millaun $5-resin.
“Ba kapitál dezenvolvimentu konsentra ba prioridade mak oinsá fó formasaun di’ak liután ba juis sira, ofisiál justisa no funsionáriu no prioridade sira seluk tan,” Deolindo dos Santos argumenta.
Jornalista : Nelson de Sousa
Editór : Francisco Simões
