Diretór Kompañia China Harbour Timor, Lda, Wang Wei, Imajen TATOLI/Antonio Gonçalves

DILI, 16 setembru 2019 (TATOLI) – Diretór Kompañia China Harbour Timor, Lda, Wang Wei, husu ba Tribunál atu estende tempu ne’ebé fó ba kompañia atu hatan ba alegasaun hosi diretór kompañia Marino Enterprise, Lda, Edencio Soares.

Karta ne’ebé emite husi Tribunál Distritál Dili (TDD), iha loron 3 setembru 2019, haktuir Wang Wei iha tempu durante loron 10 nia-laran atu entrega petisaun ka dokumentu inisiál hodi kontra faktu sira ne’ebé Edencio Soares alega.

Jerente China Harbour asina karta konstentasaun iha loron 5 setembru 2019, nune’e agora nia husu atu extende tan loron lima nia-laran hodi responde.

“Ami husu extensaun tempu ba Tribunál, ba loron lima (20/09) para bele fó resposta formál. Ami nia advogadu husu ona ba Tribunál katak iha ema mak dehan iha staff ruma mak kaer gravasaun no agora dadauk nia sei ba fériadu to’o 15 setembru. Tanba ne’e, tenke hein to’o nia tama serbisu fila-fali hodi bele hetan gravasaun, nune’e bele atualiza resposta legál sira husi Tribunál”, tenik Wang Wei ba Agência TATOLI, iha nia knaar fatin, Audian, segunda ne’e.

Notísia Relevante: China Harbour Simu Ona Karta Atu Kontesta Marino Enterprise

Tuir jerente kompañia xineza ne’e, nia parte sei prepara resposta legál ba Tribunál, ne’ebé tuir opiniaun advogadu sei remata iha segunda (16/9).

“Ami nia advogadu hanoin katak, sira (Marino Entreprise) labele hetan asesu gravasaun desizaun Tribunál, tanba gravasaun ne’e iha testamuña husi parte Marino Entreprise”, nia informa.

Wang Wei subliña, nia parte iha planu, bainhira Tribunál la halo extensaun tempu hodi fó resposta legál mak nia sei fó resposta iha 16 setembru (sein análiza kle’an husi gravasaun), maibé bainhira iha extensaun tempu husi Tribunál mak nia sei manda opiniaun bazeia ba análiza legál husi gravasaun ba Tribunál iha 20 setembru.

Edencio Soares nu’udar rekerente ka autór ba kazu disputa rai, liuhosi ninia advogadu, Pedro Eusébio Aparício de Oliveira, rekere ba Tribunál ho providénsia kautelár espesifikadu ba restituisaun pose kontra kompañia China Harbour, ho kapitál $10,000.00.

Advogadu Pedro Aparício aprezenta ba Tribunál rai ho luan 19.000 M2, ne’ebé lokaliza iha Aldeia Mota Ulun, suku Mota Ikun, postu administrativu Bazartete, Munisípiu Liquiçá, baliza rai Mariano Pereira iha parte norte no foho ho rai Estadu parte súl. Parte leste no oeste baliza ho foho no rai Estadu, Edencio Soares halo ona kontratu sosa no fa’an ho Mario Belo, ho presu $15,000.00.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here