Sekretáriu Estadu Ambiente Demétrio de Amaral de Carvalho, Imajen/Egas Cristovão

DILI, 16 setembru 2019 (TATOLI) – Governu liuhosi Sekretáriu Estadu Ambiente (SEA) no Autoridade Nasionál Petróleu no Minerál (ANPM) seidauk atribui lisensa ambientál ba Kompañia Marino Enterprise atu hala’o atividade iha área Kaitehu, Aldeia Mota Ikun, Suku Mota Ulun, Postu Administrativu Bazartete, Munisípiu Likisá.

“Tuir ha’u hatene ANPM fó lisensa ba China Habour ba site ida ne’ebé iha Kaitehu hodi halo kolesaun materiál ka fatuk ba aterra Portu Tibar no ami hatene mós katak kompañia Marino Enterprise seidauk hetan lisensa ambientál ida husi Autoridade Petróleu no Minerál”, SEA Demétrio do Amaral de Carvalho ba Ajénsia Tatoli iha salaun Katedrál-Dili, ohin.

Nia dehan, ANPM fó lisensa no SEA mak hala’o inspesaun no monitorizasaun ba empreza ne’ebé hetan ona lisensa.

Sansaun ba kompañia ne’ebé seidauk hetan lisensa, eis deputadu ne’e dehan : “Ha’u hatene sira (Marino Enterprise) seidauk halo serbisu liuliu halo eskavasaun fatuk iha fatin ne’ebá tanba laiha lisensa ambientál”, katak.

Nia afirma, lisensa ba minerál no petróleu sira ne’e ANPM mak sai hanesan autoridade hodi emite ida ne’e. Tanba ne’e kompañia ne’ebé seidauk hetan lisensa ambientál labele hala’o atividade.

“Maibé Sekretáriu Estadu Ambiente halo inspesaun no monitorizasaun nota katak ANPM fó lisensa ba China Habour la’ós ba Marino Enterprise”, nia informa.

Antes ne’e, SEA Demétrio do Amaral relata  dezde mandatu Oitavu Governu hahú husi jullu 2018 to’o 2019 liuhusi departamentu verifikasaun ambientál  konsege emite ona lisensa ambientál 200-resin ba empreza sira.

Nune’e mós Vise-Prezidente ANPM, José Gonçalves,  relata katak dezde 2018 emite ona lisensiamentu ambientál hamutuk 50 inklui ona  negósiu iha área petróleu no minerál.

Iha tinan ne’e, ANPM rasik planeia emite tan lisensa ambientál ba empreza iha area petróleu no mineral hamutuk 10 empreza.

Notísia relevante : China Harbour Simu Ona Karta Atu Kontesta Marino Enterprise

SEA Emite Ona Lisensiamentu Ambientál 200-Resin ba Empreza Sira

Jornalista: Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here