Sekretáriu Estadu Ambiente, Demétrio do Amaral de Carvalho. Imajen/Egas Cristovão.

DILI, 13 Setembru 2019 (TATOLI) – Sekretáriu Estadu Ambiente (SEA), Demétrio do Amaral de Carvalho, relata katak dezde mandatu Oitavu Governu nian konsege emite ona lisensiamentu ambientál 200-resin ba empreza sira.

Emisaun ba lisensa ambientál ne’e hahú husi simu pose iha jullu 2018 to’o mai 2019 liuhusi Departamentu Verifikasaun Ambientál iha SEA nian.

“Hahú husi ami simu pose to’o agora, melloramentu ne’ebé maka Sekretáriu Estadu Ambiente to’o agora konsege emite lisensa ambientál hamutuk 200-resin ba empreza sira”, dehan eis deputadu ne’e iha Otél Luz Clarita, ohin.

Governante ne’e haktuir ne’e nu’udar rezultadu servisu mai husi tékniku ho kuadru superiór ne’ebé tutela iha área ambiente nian.

Iha sorin seluk, Vise-Prezidente Autoridade Nasionál Petróleu no Minerál (ANPM), José Gonçalves, relata mós katak dezde 2018 ANPM emite mós lisensiamentu ambientál hamutuk 50, ne’e inklui ba iha negósiu iha área petróleu no minerál.

Iha tinan ne’e, ANPM rasik planeia emite tan lisensa ambientál ba empreza iha área petróleu no minerál hamutuk empreza 10.

“To’o fin tinan ida ne’e, ami sei fó sai tan lisensa ba iha minerál nian maizumenus sanulu no ba petróleu mós nune’e. Ami sei fó sai lisensa ambientál atu nune’e kompañia ba ida ne’e bele halo servisu”, Vise-Prezidente ne’e afirma.

Nia dehan ANPM mós daudaun ne’e fó ona suspensaun provizóriu no permanente ba empreza sira ne’ebé la halo tuir rekizitu lisensiamentu ambientál.

Notísia relevante : SEA Promete Haforsa Servisu ANALA 

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here