Prezidente Komisaun Funsaun Públika (CFP-sigla portugés), Faustino Cardoso. Imajen/Antonio Goncalves

DILI, 16 setembru  2019 (TATOLI)-Prezidente Komisaun Funsaun Públika (CFP-sigla portugés), Faustino Cardoso, informa, Funsionáriu Públiku porsentu 80 husi total 10.455  maka tuir ona  grau promosaun  husi nivel  B to’o G.

Notísia Relevante: KFP Promove Grau Funsionáriu Públiku Liuhusi Teste Eletróniku

Promosaun ne’e bazeia ba dekretu lei númeru 1/2018, rejime promosaun no hetan alterasaun ba dekretu lei númeru 05/2019, 27 Marsu.

“Kona-ba taxa partisipasaun ba  teste promosaun  ba Funsionáriu Públiku la’o di’ak tebes. Daudaun ne’e,  kuaze Funsionáriu Públiku hamutuk porsentu 80 mak tuir ona teste no  falta de’it ona porsentu 20,” hateten Prezidente KFP, Faustino Cardoso,  ohin, ba Ajénsia TATOLI, iha Ministériu Finansa, Ai-tarak Laran Dili.

Tuir oráriu teste promosaun ne’e,  sei konklui iha loron 19 fulan setembru,  hafoin KFP realiza ona teste grau ba Funsionáriu Públiku  ne’e hahú kedas iha loron 6 setembru, foin lalais ne’e.

“Hela loron ida ka rua tan sei finaliza teste ne’e,” tenik  Presidente Komisaun Funsaun Públika.

Rezultadu final ne’e, tuir Faustino Cardoso,  Komisaun Funsaun Públika sei haruka ba Ministériu  no  Instituisaun Estadu ida-idak hodi fó sai ba públiku tanba sei hetan mós mudansa salariál ba sira ne’ebé pasa iha promosaun grau.

 “Kona-ba  valór teste  hira   mak  Funsionáriu liu iha teste promosaun ne’e, husi  ekipa  juri sira tuir grau ida-idak  tuur hamutuk sei deside,” esplika Faustino Cardoso.

Jornalista : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here