Prezidente Komisaun Funsaun Públika, Faustinho Cardoso (faru kinur hamriik kotuk), observa direta teste eletrónika ba promosaun Grau Funsionáriu Públiku, iha loron dahuluk. Imajen Tatoli/Cipriano Colo

DILI, 6 agostu 2019 (TATOLI)—Komisaun Funsaun Públika (KFP), hahú halo promosaun ba grau funsionáriu públiku liuhosi teste eletróniku ne’ebé ofisiálmente hala’o abertura iha edifísiu eis Casa Europeia, Dili, tersa (06/8).

Promosaun ne’e hala’o bazeia ba Dekretu Lei númeru 1/2018, rejime promosaun no hetan alterasaun ba Dekretu Lei númeru 5/2019, 27 marsu.

Funsionáriu públiku ne’ebé tuir teste promosaun grau ho totál 10.455 hahú hosi grau B to’o G hodi hasa’e grau inferiór ba grau tuir mai.

Prezidente Komisaun Funsaun Públika, Faustino Cardoso hateten hosi númeru ne’e pursentu sanulu de’it mak sei hetan promosaun tuir grau ida-idak depende ba rezultadu teste.

Cardoso esplika, objetivu hosi teste ne’e rasik atu fó oportunidade ba funsionáriu públiku sira ne’ebé priénxe rekizitu bele tuir teste hodi hasa’e sira-nia grau no atu fó serteza ba dezenvolvimentu karreira, inklui hasa’e funsionáriu públiku sira-nia motivasaun serbisu.

Faustino fó hanoin katak teste promosaun ne’e primeiravez hala’o iha istória Administrasaun Públika Timor-Leste, tanba dezde tinan 2002 to’o 2019 bazeia de’it ba ida-idak nia polítika instituisaun ninian—seidauk iha sistema ida ne’ebé mak defini ho didi’ak kona-ba oinsá atu la’o ba oin ho kareira profisionál funsionáriu ida-idak. Barak liu seidauk hetan promosaun, liliu funsionáriu ne’ebé serbisu iha munisípiu.

“Hahú ohin ba oin, promosaun sei hala’o regulármente tinan–tinan. Ba sira ne’ebé seidauk promovidu bele tuir fali iha tinan oin mai, nune’e de’it to’o susesu,” nia subliña.

Tuir ajenda, teste loron ida iha  kandidatu 350. Parte dadér atende kandidatu 175 no lokraik 175. Promosaun ne’e hahú iha 6 agostu no sei termina iha setembru 2019, iha edifísiu eis Casa Europeia.

Totál pergunta ba teste eletróniku hamutuk 100, kobre iha área administrasaun finansa,  jestaun, matemátika, jéneru, língua tétun no portugés, lejizlasaun Funsaun Públika, istória Timor, konstituisaun RDTL no área seluk ne’ebé hala’o iha serbisu fatin lor-loron.

Sekretariu Estadu Protesaun Sivil, Alexandrino Araújo ne’ebé partisipa iha serimónia abertura promosaun ne’e fó parabéns ba Komisaun Funsaun Públika ne’ebé prodúz sistema eletrónika ba teste promosaun funsionáriu públiku sira.

Membru governu ne’e fiar katak ho sistema eletróniku ne’e bele halakon deskonfia malu ba teste hotu ne’ebé antes ne’e akontese iha KFP, tanba sistema ida ne’e nakonu ho transparénsia.

Jornalista: Cipriano Colo  

Editór: Xisto Freitas

HAKEREK NO HATÁN

Please enter your comment!
Please enter your name here