Estudante timoroan sira ne’ebé mak sei ba kompete iha Malázia. Foto TATOLI: Tomé Amado

DILI, 16 setembru 2019 (TATOLI) – ASTI (Association Science Technology of Innovation ASTI) hetan fiar husi Ministériu Edukasaun, Juventude no Desportu (MEJD) halo selesaun hodi hili eskola haat iha Dili hanesan Eskola Ensinu Sekundáriu São Pedro, Eskola Ensinu Sekundáriu Jerál 4 Setembru, Eskola de Hospitalidade Turismo, Becora no Eskola Sekundáriu Jerál Canossa, hodi reprezenta Timor-Leste iha kompetisaun siénsia no matemátika ne’ebé mak sei realiza iha Malázia, 21 setembru.

Koordenadór ASTI, Charles F. Guterres informa katak selesaun hala’o de’it ba iha eskola haat tanba tempu limitadu atu halo preparasaun. Estudante na’in lima ne’ebé mak ASTI eskolla husi eskola haat ne’e mak hanesan na’in rua husi Eskola 4 setembru ho naran Veronica Diaz Monteiro no Marlina Marque Cabral.

Husi eskola Sao Pedro reprezenta husi Lucrécia Araújo dos Reis, Eskola Canossa reprezenta husi Celina Maria Vandachiva Alves Tilman no ikus liu eskola de Hospitalidade no Turismo Becora reprezenta husi Alberto Salomao dos. Santos.

“Ida ne’e mak kritériu tanba ASTI hatama tiha ona rekerimentu. Ne’ebé, na’in lima de’it mak hetan oportunidade. Maibé tenke hetan estudante ne’e iha kualifikasaun di’ak liu iha eskola ida nia laran inklui tenke hatene inglés ho di’ak,” tenik Koordenadór Charles F. Guterres ba jornalista sira iha salaun enkontru MEJD, Vila Verde, segunda (16/09/2019).

Nia haktuir, selesaun ne’e hahú kedas iha inísiu fulan fevereiru 2019. Kuandu selesaun ne’e hetan ona rezultadu pozitivu ninia parte foin manda proposta ba Malázia iha marsu. Depois iha maiu mak proposta ne’e foin hetan short list. “Kuandu rezultadu short list ne’e iha ona ita-nia liman maka durante fulan tolu nia laran ita halo invensaun”.

Koordenadór Charles F. Guterres informa tan katak finalidade husi preparasaun sira ne’e termina iha 21 Agostu 2019 no ASTI submete relatóriu ba Malázia hodi hetan aprovasaun.  “Agora daudaun Timor-Leste hamutuk ho nasaun 120 itál sei hasoru malu iha 21 setembru hodi halo kompetisaun iha grande finál, Malázia.

Tuir planu ekipa ne’e sei arranka ba Malázia iha loron 18 setembru 2019 mo sei fila fali iha loron 23 setembru 2019.

Notísia relevante:Lucrécia Orgullu Reprezenta TL Kompete Iha Siénsia No Matemátika Iha Malázia

Jornalista : Tomé Amado

Editór        : Rafy Belo

HAKEREK NO HATÁN

Please enter your comment!
Please enter your name here