Prezidente Konsellu Rádiu Komunidade Rai Husar, Camilo da Costa. Foto TATOLI: Nelia Fernandes

AILEU, 16 agostu 2019 (TATOLI)—Prezidente Konsellu Rádiu Komunidade Raí Husar Aileu, informa ezisténsia Rádiu Komunidade Rai Husar Aileu kle’ur ona maibé komunidade iha Postu Administrativu tolu seidauk bele asesu ho di’ak.

“Komunidade iha Aileu laran ne’e sira asesu rádiu komunidade ho di’ak. Husi komunidade Ermera, Maubise, sira mós bele asesu, só Postu Administrativu Remexiu la asesu tomak, Lekidoe ho Laulara sorin de’it,” dehan Prezidente Konsellu Rádiu Komunidade Rai Husar, Camilo da Costa, ba Ajénsia TATOLI iha tersa, (13/08/2019) liu ba.

Nia informa, rezultadu refere bazeia ba peskiza ne’ebé sira halo daudaun hela ba prosesu kobertura no transmisaun kona-ba ezisténsia Rádiu Rai Husar Aileu ne’ebé hala’o iha Portu Administrativu tolu.  Peskiza refere hala’o serbisu hamutuk ho xefe suku sira, tau pontu fokál ba kada postu administrativu atu sira bele hetan informasaun, hodi bele públika fila-fali iha Rádiu Komunidade refere.

Durante ne’e hetan tulun orsamentu husi Governu, Prezidente Konsellu Rádiu Komunidade Rai Husar hatán, durante ne’e sira seidauk hetan Fundus Transferénsia Públiku husi Governu liuliu Sekretáriu Komunikasaun Sosiál (SEKOMS).

“Maibé, ha’u hakarak informa katak daudaun ne’e ami haruka ona proposta balun ba ajénsia balun no hetan ona osan balun. Agora daudaun ami jere hela no la’o di’ak,” nia dehan.

Tuir nia, kolaborasaun komunikasaun Rádiu Komunidade Rai Husar la’o di’ak ho ninia programa edukativu sira hanesan edukasaun, saúde, agrikultura no halo programa talk show ba lideransa sira iha munisípiu ida ne’e.

Programa sira ne’e bele la’o di’ak tanba iha fasilidade  komputadór rua no fasilidade estúdiu nian ne’ebé fasilita sira hodi habelar informasaun sira ba públiku. Maibé, tuir nia, sira sei halo planu hodi sosa tan fasilidade balun ba rádiu komunidade refere.

Rekursu umanu ne’ebé daudaun halo knaar iha fatin refere, nia informa, hamutuk ema na’in 12. Husi ema hirak ne’e, ema na’in neen (6) ativu no hetan apoiu orsamentu husi fundus transferénsia públiku nian no mós iha voluntáriu balun ne’ebé ajuda sira na’in hira ne’e.

“Ha’u uluk husi duni ba iha Sekretáriu Estadu Komunikasaun Sosiál (SECOMS) ba iha rádiu ne’e atu halo kobertura iha de’it ne’e. Se bele loke tan liras oinsá maka komunidade sira iha área postu tolu ne’e bele asesu ba iha rádiu komunidade ne’e, liuliu ba informasaun lokál nian,” Prezidente subliña.

Notísia relevante:Governu Apoiu Osan Rihun 61 ba Rádiu Komunidade Sira

Jornalista : Nelia Fernandes

Editór       : Rafy Belo

1 KOMENTÁRIU

  1. Agradese ba ba governu timor leste nebe mak tau ona radiu komunidade kada munisipio ida ida atu nune komunidade sira hodi bele asesu informasaun.
    Maibe hau mos nudar ema komunidade senti laran tirste tebes tamba radiu komunidade rai husar aileu stabelese iha munisipio aileu kuase tinan hira ona maibe ami husi posto remexio nunka asesu ate agora.

    Pergunta mak ne :
    Postu administrativo remexio ne inklui hotu ba iha postu munisipio aileu kalae?
    Se karik ami inklui hotu entaun tamba saida mak ami la asesu ba radio komunidade rai husar aileu?

    Hau nia dividas mak ne deit karik liafuan ruma la monu ba nai ulun sira nia laran karik hau husu dsskulpa

    Obrigado

HAKEREK NO HATÁN

Please enter your comment!
Please enter your name here