Sekretáriu Estadu Ambiente, Demétrio do Amaral de Carvalho. Imagen Egas Cristovao.

DILI, 13 Setembru 2019 (TATOLI) – Sekretáriu Estadu Ambiente (SEA), Demétrio do Amaral de Carvalho, hatete SEA sei haforsa servisu Ajénsia Nasionál Avaliasaun Lisensiamentu Ambientál (ANALA) ho kualidade nune’e bele fó melloramentu servisu ba iha kestaun lisensiamentu ambientál nian.

Governante ne’e dehan durante ne’e ANALA hala’o kna’ar hanesan departamentu ida iha SEA ne’ebé hanaran Avaliasaun Impaktu Ambientál, maibé SEA rasik halo ona transformasaun husi departamentu ba iha ajénsia.

Razaun halo transformasaun ne’e atu fó kompeténsia hodi hasae sira-nia servisu la’ós de’it halo servisu emisaun ba iha lisensa ambiente nian, maibé haree ba iha kualidade.

“Tanba ne’e maka ohin ita halo seminar ida atu kompartilla knaar Ajénsia Nasionál Avaliasaun ba Lisensiamentu Ambientál nune’e públiku bele hatene liután servisu ajénsia ida ne’e rasik”, hatete Sekretáriu Estadu ba jornalista sira hafoin remata semináriu sobre papél ANALA iha Otél Luz Clarita, ohin.

ANALA la’ós de’it emite lisensiamentu ambientál, maibé haree ba iha kualidade lisensa ambientál nian en termu oinsá halo analiza risku sira bainhira fó lisensa.

Vise-Prezidente Autoridade Nasionál Petróleu no Minerál (ANPM), José Gonçalves, dehan prezensa ANPM ne’e importante oinsá atu partilla mekanizmu no rekizitu sira liuliu foka ba iha área petróleu no minerál, oinsá atu haree nian risku antes fó lisensa ba iha empreza sira. Tanba iha petróleu nian ANPN sei la fó lisensa ambientál arbiru tanba indústria petróleu ne’e rasik nu’udar indústria foun ida ba Timor-Leste.

“Ita-nia kompañia privada seidauk kaer ida ne’e no ita iha de’it kompañia nasionál ida hodi haree, tanba ne’e ami presiza haree hodi tetu risku husi indústria ne’e antes fó lisensa”, katak José Gonçalves.

Vizaun ANALA maka nu’udar ajente públiku ida ne’ebé sei garante dezenvolvimentu ambientál ida sustentavel iha Timor-Leste, liuhusi kna’ar espesiál ba emisaun lisensiamentu ambientál ho efetivu, efisiente no akuntavel.

Misaun maka asegura polítika no regulamentu ambientál kona-ba lisensiamentu ambientál ho transparénsia, efikásia, justu, ekilíbriu no sustentavel. Garante servisu ida ho kualidade, profisionál, étiku, hodi ezekuta servisu ba interese públiku no fó satisfasaun ba iha públiku.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here