DILI, 13 setembru 2019 (TATOLI)-Diresaun Nasionál Jestaun dezastre husi Sekretáriu Estadu Protesaun Sivíl, ohin, distribui ona apoiu emerjénsia ba vítima ahi han uma hamutuk 12 iha Aldeia Labubu, Suku Laku-Mesak, Postu Administrativu Laklubar, Munisípiu Manatuto.
Notísia Relevante : Governu Sei Distribui Apoiu ba Vítima Dezastre Uma Kain 1.881
Kazu ahi han uma komunidade 12 ne’e akontese iha loron 09 fulan Setembru 2019. “Kona ba dezastre ahi han uma hamutuk 12 iha Labubu, Suku Laku-Mesak, hetan ona apoiu emerjénsia,” informa Diretór Nasionál Jestaun Dezastre, Agustino Gomes Belo ba Ajénsia TATOLI, ohin, iha Caicoli, Dili.
Nia informa, apoiu emerjénsia ne’ebé diresaun nasionál jestaun dezastre distribui maka foos, Supremie, Manta, Biti, Sabaun no seluk tan.
Oras ne’e daudaun, ekipa pontu fokál ministériu kontinua halo levantamentu dadus kona-ba akontesimentu ne’e hodi hatene motivu loloos para bele hetan apoiu materiál konstrusaun husi Governu.
Jornalista : Nelson de Sousa
Editór : Francisco Simões
