Primeiru-Ministru, Taur Matan Ruak, kaer liman ho Defensoria Públika Jerál, Câncio Xavier, iha Palásiu Governu. Imajen/António Goncalves

DILI, 12 setembru 2019 (TATOLI) – Oras nee daudaun Ministériu Reforma no Lejizlativa Asuntu no Parlamenteres (MRLAP) halo hela konsultasaun publika ba lei kostumeiru no justisa tradisionál atu bele ajuda fó kompeténsia legal ba étnika no suku sira rezolve kazu sivíl iha ida-idak nia suku laran.

Notísia Relevante : MRLAP Kontinua Halo Konsulta Públiku Kona-ba Lei Kostumeiru ho Justisa Tradisionál

“Ha’u hanoin lei rua di’ak tebetebes ho razaun katak hamenus serbisu sira iha Tribunal liuliu ba kazu sira ne’ebé mak ho natureza semi públiku hanesan na’ok manu, basa malu, tebe malu no rakut malu,” dehan Defensor Públiku Jerál, Câncio Xavier ba Ajénsia TATOLI, iha nia knaar fatin Defensoria Públika, Maskarinhas, Dili, kuarta (11/09/2019).

Câncio Xavier konsidera,  kuandu lei rua nee mak sai lei formal maka sei fó mós kompeténsia autoridade lokál hanesan konsellu suku kompostu husi xefe suku, xefe aldeia no lian atu rezolve problema tuir valor krime.

Kuandu lei rua nee mak eziste ona, tuir nia, kazu ki’ik oan sira la presiza mai iha Tribunal, se lae sira lao dook tebes hodi tuir julgamentu, sira tenke husik sira nia vida agrikultór no tenke buka osan hodi selu karreta. Maibé, too iha Tribunal krime ne’ebé mak populasaun komete ho natureza semi públiku, ikus mai sira konkorda no rezolve tuir família de’it.

Ministru Justisa, Manuel Cárceres da Costa. Imajen/Antonio Goncalves

Iha biban seluk, Ministru Justisa, Manuel Cárceres da Costa, esplika, lei kostumeiru no justisa tradisionál ne’ebé mak sosializa husi MRLAP iha territóriu Timor laran tomak konsidera kapás tebetebes tamba bele hariku polítiku sira nia pensamentu atu fó kaben lei justisa tradisionál no lei justisa formal.

“Ha’u husu ba MRLAP atu iha konsultasaun publika presiza haree didi’ak tradisaun husi parte ida ba parte seluk no labele jeneraliza katak saida mak akontese Suai aplika ba Lospalos, saida mak aplika ba Lospalos no saida mak akontese iha Lospalos aplika fila fali ba fatin seluk,” nia esplika.

Jornalista : Domingos Piedade

Editór        : Francisco Simões

HAKEREK NO HATÁN

Please enter your comment!
Please enter your name here