Sekretáriu Autoridade Munisipál Dili, José Filipe Ximenes Smith

DILI, 4 Jullu 2019 (TATOLI)—Sekretáriu Autoridade Munisipál Dili, José Filipe Ximenes Smith hateten estasionamentu nia rendimentu la’o ho di’ak tebes, tanba loron ida rekolla $80 hosi estasionamentu iha Kolmera no Taibesi loron ida atinje $120.

“Estasionamentu nia rendimentu loro-loron la’o di’ak.  Hosi estasionamentu Kolmera nian, loron ida dalaruma hetan $80, sa’e to’o $90 no bele to’o $100.  Hosi Taibessi nian dalaruma atinje $115 no dalaruma mós sa’e to’o $120, konforme movimentu ne’ebé la’o iha ne’ebá,” José Filipe Ximenes Smith ba Agência Tatoli iha nia kna’ar fatin, Dili, ohin.

Nia esplika, hafoin halo kobransa iha fatin refere, iha lokraik supervaizór hosi ekipa kobransa mai hatama reseita (osan) ba parte finansa Autoridade Munisipál Dili.

“Autoridade Munisipál Dili halo balansu kontájen entre kartaun ho osan ne’ebé tama, depois rekolla hamutuk no ba hatama iha kofre estadu. Osan la tau iha Autoridade Munisipál Dili,” José informa.

Nia haktuir, sira identifika ona fatin neen (6) mak atu utiza tan ba iha estasionamentu no entre fatin neen refere ida maka iha parte Kuartél Jerál PNTL nia oin to’o mai iha Ministériu Estatal nia oin.

“Oras ne’e seidauk monta sinál iha ne’ebá, maibé kuandu prontu ona, entaun sei halo karta koñesimentu ba instituisaun ne’ebé besik iha fatin refere para bele iha koñesimentu depois bele apoia ka bele iha entendimentu no kooperasaun para bele selu taxa tuir regra ne’ebé iha,” kantór ne’e haklaken.

Jornalista: Nelia Fernandes

Editór: Xisto Freitas

HAKEREK NO HATÁN

Please enter your comment!
Please enter your name here