Sekretáriu Estadu Komunikasaun Sosiál (SEKOMS), Merício Juvinal dos Reis "Akara" akompaña ho Diretór Nasionál Sentru Rádiu Komunidade, Abel da Conceição no Prezidente Ajénsia Notisioza Timor-Leste, José da Costa, entrega komputadór ka dekstop ida, tape recorder rua no bateria APC ida ba Rádiu Tokodede Likisá. Foto/Florencio M. Ximenes.

LIKISÁ, 11 setembru 2019 (TATOLI) – Sekretáriu Estadu Komunikasaun Sosiál (SEKOMS), Merício Juvinal dos Reis “Akara”, akompaña husi Diretór Nasionál Sentru Rádiu Komunidade, Abel da Conceição no Prezidente Ajénsia Notisioza Timor-Leste, José da Costa, entrega komputadór ida, tape recorder rua no bateria APC ida ba Rádiu Komunidade Tokodede Likisá.

SEKOMS friza katak vizita Rádiu Komunidade Tokodede ne’e atu fó motivasaun no apoia ekipamentu ba jornalista atu uza halo kobertura hodi divulga informasaun ba públiku.

Merício Akara dehan polítika Governu kontinua apoia rádiu komunidade sira iha territóriu tomak liuliu apoia morál, ekipamentu no transporte atu hafasil halo kobertura ba atividade Governu atu sidadaun hotu akompaña.

“Iha tinan ne’e, ami sei apoiu motór ida ba kada rádiu komunidade sira hamutuk 16, atu fasilita sira hodi divulga informasaun ba públiku”, Sekretáriu Estadu informa iha Rádiu Komunidade Tokodede, ohin.

Iha fatin hanesan, Diretór Nasionál Sentru Rádiu Komunidade (CRC, sigla portugés), Abel da Conceição, dehan CRC esforsu aan atu kontinua apoia rádiu komunidade sira iha territóriu liuliu ekipamentu atu fasilita jornalista sira hala’o kobertura.

Diretór CRC ne’e salienta atu apoiu rádiu komunidade sei kontinua koopera ho parseiru internasionál atubele tulun ekipamentu.

“Ita mós apoia ona osan ba komunidade sira no ita sei kontinua apoia iha faze daruak tanba ita hahú simu relatóriu ba faze dahuluk”, katak.

Nia promete sei hadi’a kondisaun ba sala produsaun Rádiu Komunidade Tokodede.

Jestór Rádiu Komunidade Tokodede, Eduardo T. Exposto, agradese ba Governu liuliu SEKOMS ne’ebé apoia ona ekipamentu hodi fasilita sira-nia atividade.

“Ami agradese tebes tanba hetan apoia atu fasilita ami-nia servisu. Ami husu ona atu hadi’a kondisaun sala produsaun no hetan rezultadu pozitivu”, nia agradese.

Jornalista : Florencio Miranda Ximenes

Editora : Maria Auxiliadora

1 KOMENTÁRIU

  1. Loloos ne Agência UNICEF mk fo… Maibe tanba kooperasaun ho Secoms liu husi Diresaun Centro Radio Comunidade mak oferese ekipamentu sira nee…. Obrigada

HAKEREK NO HATÁN

Please enter your comment!
Please enter your name here