Vise-Ministru ba Dezenvolvimentu Estratéjiku Saúde, Bonifácio Maukoli dos Reis.Imajen/Antonio Goncalves

DILI, 10 setembru 2019 (TATOLI)-Vise-Ministru Dezenvolvimentu Estratejiku Saúde, Bonifácio Maucoli dos Reis informa katak Ministériu Saúde (MS) aprezenta ona ba KROP (Komité Revizaun Orsamentu Polítika) kona-ba Orsamentu Pakote Fiskál 2020 nian ba iha Ministériu Finansa (MF). Pakote orsamentu MS nian mak 47.5 millaun; aloka ba saláriu no vensimentu no ba kapitál menór, orsamentu la tau.

“Kapital dezenvolvimentu ita tau 30 mil hodi harii fatin hakmatek ba ema sira ne’ebé mak iha violénsia doméstika no alokasaun ne’e ba sentru saúde neen por kada sentru saúde 5 mil ba fatin hakmatek no mós alakosaun ba transferénsia publika nian,” informa Vise-Ministru, Bonifácio Maucoli dos Reis ba mídia sira iha edifísiu MF, Ai-tarak laran, ohin.

Nia haktuir, MS iha proposta adisionál 3.7 millaun para hodi halo tan kompra ba ambulánsia multi-funsaun; tau 1.4 millaun hodi hola karreta multi-funsaun hamutuk 11 no ambulánsia 11 no orsamentu seluk ita aloka fali mós ba sosa ekipamentu médiku no ekipamentu naun-médiku.

“Ita haree iha ospitais referais sira no mós sentru saúde internamentu sira no agora dadaun kama sira mos komesa aat ona liuliu ba lensól no mós froiña, sumasu sira, ita prezisa tau mós orsamentu”.

“Ita mós presiza tau osan mós ba iha prestasaun kuidadu saúde primária no aloka orsamentu ne’e ba iha sentru saúde munisípiu sira  para hasa’e kobertura universál liuliu liga ba prestasaun kuidadu saúde primária,” hateten governante ne’e.

Orsamentu ba kapitál dezenvolvimentu, nia dehan, ne’e konsentra iha Ministériu Obras Públika (MOP).

“Liuhusi fundu kapitál nian ne’ebé mak ami sei halo ezersísiu atu bele reuniaun fila fali ho sira oinsá atu propoen nesesidade Ministeriu Saúde nian liliu liga ba iha área infraestutura atu harii klínika no postu saúde sira ne’e identifikadu ba iha sukus no aldeia sira ne’e mak ho populasaun mais de mil ba leten tanba ne’e tenke harii postu saúde ba komunidade sira para atende sira ho di’ak.

Enkuantu kona-ba Orsamentu adisionál, Vise-Ministru Dezenvolvimentu Estratejiku Saúde, Bonifácio Maucoli dos Reis hateten: “Ha’u hanoin orsamentu adisionál ne’e sufisente ona hodi bele responde ba iha nesesidade 2020 nian.

“Ita hatene katak orsamentu aloka ona mai ne’e só ba saláriu vensimentu, bem no servisu no mós ba iha transferénsia públika tanba orsamentu trasnferénsia públika ne’e inklui ona orsamentu ba munisÍpiu sira para hodi fó prestasaun kuidadu saúde primaria,” governante ne’e esplika.

Aloka Rihun 180 Ba Klínika Bairru-Pité

 Governante ne’e mós informa tan katak Orsamentu Pakote Fiskál 2020 MS nian, tau mós rihun 180 atu apoiu Klínika Bairru-Pité, liuhusi kooperasaun no memorandu intendimentu ne’ebé MS realiza ho klínika ne’e.

“Orsamentu ne’ebé apoiu hamutuk 180 mil. Maibé, ita mós apoiu ba rekursu umanu liuliu nesesidade ne’ebé iha, ita apoiu médiku, enfermeiru, parteira, medikamentu no ekipamentu.,” informa Vise-Ministru Dezenvolvimentu Estratejiku Saúde, Bonifácio Maucoli dos Reis.

“Orsamentu ne’ebé ita aloka atu haree liuliu ba prestasaun servisu, liuliu ba fornesimentu hahán nian iha Klínika Bairru-Pité,” reforsa tan governante ne’e.

Nia mós esplika, orsamentu ne’ebé MS atu aloka ba Klínika Bairru-Pité rihun 180, haree mós sira-nia (klínika) prioridade no nesessidade tanba ne’e mak propoen liu tiha fali orsamentu ne’ebé ba ospitál referál sira.

“Ita hatene agora ospitál referál ninia kapasidade ne’ebé aumenta maibé Klínika Bairru-Pité ita hatene hanesan Sentru Saúde ida ninia kapasidade hanesan sentru saúde ida ne’ebé ita apoiu 180 mil ne’e mos sufisiente ona no bele konklui mos saláriu”.

“Ita indentifika de’it nesesidade sira, se sira falta rekursu umanu ita apoiu rekursu umanu, se sira falta ekipamentu ita apoiu ekipamentu, sira falta medikamentu ita apoiu medikamentu,” garante vise-ministru.

Iha fatin hanesan, Diretór Ezekutivu HNGV (Ospitál Nasionál Guido Valadares-sigla Portugés), Aniceto Barreto hateten, iha diskusaun proposta Pakote  Orsamentu Fiskál 2020 ba orsamentu aloka ba HNGV hamutuk rihun 10.8. Maibé, seidauk sura ba kapitál dezenvolvimentu no kapitál rekursu umanu nian.

Nia haktuir, Primeiru-Ministru Taur Matan Ruak haree liu nafatin ba HNGV suporta nafatin orsamentu 2020.

“Orsamentu ne’ebé ami propoen kuaze aprova hotu, aseita no planu ne’ebé ami tau tanba 2020 foku de’it ba área importante haat,” informa Diretór Aniceto Barreto.

Área haat ne’e, tuir ezekutivu ne’e mak: “Primeiru, ita hadia kualidade kapasitasaun pesoál no rekursu umanu, segundu ita hadi’a infraestutura no renovasaun, terseiru halo mudansa banku urjénsia no loke tan espasu ba banku urjénsia, kuartu atu sentraliza kapitál menór; ba ozijéniu ba moras sira”.

Notísia relevante:Klínika Bairru-Pité Hetan Apoiu Orsamentu 83.268.53 USD Husi GPM

Jornalista   : Felicidade Ximenes

Editór          : Rafy Belo

HAKEREK NO HATÁN

Please enter your comment!
Please enter your name here