DILI, 09 agostu 2019 (TATOLI)-Fundasaun Klínika Bairru-Pité, Lanud (FCBL-sigla portugés), Dili, hetan ona apoiu orsamentu ho valór 83.268.53 USD husi GPM liuhusi Gabinete Apoiu Sosiedade Sívil (GASS-sigla portugés), hodi garante ninia funsionamentu.

Apoiu ne’e halo tanba GPM iha loron 28 juñu 2019 asina ona nota entendimentu (MoU-Memorandum of Understanding) ida ho Klínika Bairru-Pité. Bazea ba MoU ne’e, GPM sei fó uluk 40% husi totál orsamentu ne’e no depois orsamentu ne’e ezekuta hotu no Klínika Bairru-Pité halo relatóriu mak GPM sei hala’o tan transferénsia 70%.

“Hahú loron 1 no 2 fulan agostu ne’e ami simu ona orsamentu husi transferénsia konta estadu hamutuk 40% ($33.307) ho osan ne’e ami utiliza tuir saida mak prevee iha MoU ne’e rasik,” informa Jestór Klínika Bairru-Pité, Inácio dos Santos ba Ajénsia TATOLI, iha kuarta liubá.

“Tanba iha MoU ne’e rasik hateten katak orsamentu ne’ebé ami uza $83,268.53 no mais ou menus ami uza 75 mil dolares ami uza ba saláriu vensimentu funsionáriu nian no 17 mil dolares mak ami utiliza ba iha operasaun no alimentasaun ba pasiente sira,” klarifika tan jestór ne’e.

Nia dehan, 40% ne’e uza ba funsionáriu sira fulan ida nian tanba loron hira liu ba (antes hetan apoiu) sira konfuzaun uitoan kona-ba oinsá klínika ne’e la’o ba oin tanba orsamentu la iha atu taka internamentu, la iha hahán, la iha orsamentu ba alimentasaun ba pasiente entaun taka klínika temporáriu para hein orsamentu husi governu.

“To’o ikus ami hetan orsamentu husi Gabinete Apoiu Sosiedade Sívil husi Primeiru-ministru ne’ebé sira suporta, entaun fundus ne’ebé iha no ami iha osan uitoan hodi bele aumenta la’o hodi suporta tan husi fatin seluk liuliu Ministériu Saúde nian,” akresenta Jestór Klínika Bairru-Pité, Inácio dos Santos.

Jestór ne’e esplika, atu utiliza orsamentu ne’ebé mak iha, sira iha regulamentu ne’ebé tuir MoU ne’e rasik, buat hotu tenke la’o tuir MoU, utilizasaun orsamentu tenke la’o tuir MoU tanba iha MoU ne’e rasik mensiona katak tenke halo relatóriu kada mensal,  relatóriu trimestrál no utilizasaun orsamentu 40% depois hein tan orsamentu 70% mai tan no relatóriu finál.

“Depois orsamentu ne’e hotu, too iha loron 31 dezembru, relatóriu finál tenke submete ona no iha MoU ne’e rasik katak orsamentu ne’ebé ami la utiliza hotu entaun orsamentu sira ne’e tenke fila fali ba konta estadu tanba ne’e mak ami utiliza ho kuidadu orsamentu estadu ne’e ho di’ak,” nia garante.

Jestór Klínika Bairru-Pité, Inácio dos Santos hateten tan: “Orsamentu ne’e estadu nian utiliza ho kuidadu atu nune’e bele di’ak tanba orsamentu  husi Primeiru-ministru rasik mak utiliza tanba Tribunal de Contas halo auditória ba sira rasik no utiliza tuir dalan, tuir prevee iha MoU ne’e rasik  para labele prejudika ba futuru,” nia konklui.

Entretantu, tuir publikasaun pájina Facebook ofisiál Klínika Bairru-Pite nian iha kuarta (07/08/2019) fó sai katak orsamentu ne’ebé apoiu husi GPM liuhusi GASS sei utiliza tuir MoU kláuzula 3, alínea 2, a no b, ne’ebé prevee ona iha MoU ne’e rasik.

Notísia relevante:ZONIZE Apoiu $20.000 Ba Klínika Bairru-Pité

Klínika Bairru Pité  Hetan Ona Tulun Osan Rihun 30

Jornalista:  Felicidade Ximenes

Editór     : Rafy Belo

HAKEREK NO HATÁN

Please enter your comment!
Please enter your name here